Pan por u Syiem Nongspung 4 taiew, ai ka KHADC hapoh 2 taiew

Shillong: U Syiem ka Hima Nongspung u Paiem Patrick Syiemiong u la pan por 4 taiew na ka KHADC ban pynbiang ia ki jingkhein jingdiah jong ka Hima, hynrei ka Council ka la ai por tang ar taiew ba un pyndep.
Ha ka jingshisha, ka KHADC ka la buh sngi ban shim bishar myn hynnin ka sngi ia u Syiem ka Hima Nongspung, hynrei u la phah da u nongiasaid ain, ban pan por namar ba um pat lah ban pynbiang ia ki jingkhein jingdiah. Ia kane la iathuh da u Dy.CEM ka KHADC u bah Pyniaid Sing Syiem hadien ba la shim bishar.
Ka KHADC ka la khot bishar ia u Syiem Nongspung halor ka kynrum kynram ki kam pisa pilain, bad ka jinghuri hura Shnong.
U Dy.CEM ka KHADC ba peit ia ka Elaka u bah Pyniaid Sing u la iathuh ba ka Council ka la khot bishar ia u paiem Patrick hadien ba la ioh ia ka jingujor na ki ar kynhun ba ujor pyrshah ia u Syiem.
Kine ki ar kynhun ba la ujor pyrshah ia u syiem ki long u Sordar Raid Warmawsaw, Umsohbar bad ka kynhun u bah Killing Rani. Ki la ujor halor ka jingbym biang ia ka rukom pyndonkam ia ka pisa ka Hima bad ka jingiapait iapra shnong.
“Ngi khot ia ki 2 kynhun ba la ujor pyrshah ia u Syiem, hynrei na ka liang u Syiem, ula pan por 4 taiew hynrei ka KHADC ka la ai por tang 2 taiew namar ba kane ka jingbishar ka la don teng la 4 sien mynta”, la ong u bah Pyniaid.
U la ong ba ka Council ka la bthah ia u Syiem ban wanrah ia ki kot ki sla ba iadei bad ki bank, ki kam pisa tyngka bad kiwei ki kot ki sla ha ka jingshong bishar ban sa wan.
Kawei pat ka jingkhot bishar mynta ka sngi, ka long hapdeng ia u Syiem ka Nongspung u paiem Patrick Syiemiong bad ia u Secretary bah Michael Warjri hynrei namar ba la ioh jingthoh na u bah Michael bym lah ban wan namar bym khlain bha ka met, la pyntud noh ia kane ruh.
Ia u Syiem bad u secretary la khot hajir halor ka jingmih ka kynrum kynram ba iadei bad ka jingai NoC ia ka Assam ban shna surok ha ka thain khappud bad ka Assam jong ka Hima Nongspung.