Pan por u myntri ka Assam, halor ka jurip kam pud sha East Jaintia

Shillong: U Ma Lahkmen Rymbui, Myntri ka tnad kam pohing u ba dei ruh u dkhot ka Regional Commitee kaba dei peit ia ka East Jaintia Hills, u la iathuh ba na ka liang ka ka Regional Commitee kam pat lah ban ai ia ka kaiphot sha u myntri rangbah ka jylla u Conrad K Sangma, namar ba na ka liang u myntri ka Assam u la pan por sa 15 sngi ban bishar ia kane ka bynta.

Haba ia kren bad ki lad pathai khubor, na ka liang u bah Rymbui u la ong ba ka Regional Commitee na East Jaintia Hills kaba la khlieh da u bah Sniawbhalang Dhar, ha ka 28 tarik u Naiwieng ka la pynlong ia ka jingialang bad u chairman ka Commitee na Assam bad ha kane ka jingialang, na ka liang ka Regional Commitee ka la pyni ia ki jaka kiba hap hapoh ka Meghalaya bad kiba dei ban hap hapoh ka Meghalaya. “Hynrei na ka liang u Myntri na Assam u la pan por ban peit bad bishar katno ka heh kata ka jaka bad na kane ka daw, na ka liang ka Commitee ka la pan por biang sa 15 sngi ban ailad ia ka Assam ba kan bishar bniah shuwa ban phah ia ka kaiphot sha u myntri rangbah”u la ong.

U la bynrap ruh ba na ka liang jong u, u kyrmen ba hapoh ka ne ka tarik na ka liang ki ophisar na baroh artylli ki district kin lah ban peit bad bishar bniah khnang ba ka jingpynbeit ia u pud u sam kan long ka ba pura.

Na ka liang ki ar tylli ki Commitee jong ki ar jylla kin sa kynduh biang ha shuwa ka 15 tarik, ban bishar ia ka kaiphot shuwa ban phah ia kane sha u myntri rangbah la iathuh u bah Rymbui. U bah Lahkmen u la iathuh ruh ba ha kaba ia dei bad ka Ratachera kam don ka jing ia kajia pud hapdeng ki nongshongshnong, hynrei ka dei beit na ka sorkar sha ka sorkar, u la bynrap ruh “Hynrei ka don hi ka jingeh namar ba kane kajaka ka ba marjan shato katkum ka map jong ka Assam ka don ka wildlife sanctuary jong ki, na kane ka daw ka don ka jingeh khyndiat kaba ngin hap ban bishar”. “Hynrei kaba kongsan ka long ba kane ka dei ka sien kaba nyngkong kaba ki Myntri rangbah na ki ar jylla ki la iaid shakhmat ban pyndep shuwa ia ka jingpynbeit ia ki bynta ba suk bad nangta sa bishar pat ia ki bynta ba don jingeh bad da ka jingkut jingmut jong ki myntri rangbah nga kyrmen ba kane ka mat yn lah noh ban pynbeit kham kloi”u la ong.