Shillong:U Director ka NEIGRIHMS u Dr. Nalin Mehta ula pan por shi taiew na ka Khasi Students Union (KSU) ba un ai jubab halor ka jingujor ka seng pyrshah ia ka rukom pyniaid thungkam ha katei ka hospital sorkar pdeng.
Ha kajuh ka por, ka eksamin thungkam kan sangeh shwa ia mynta shipor haduh ban pynbeit shai kdar. Ia kane la pyntip u nongialam ka KSU u samla Rueben Najiar sha ki lad pathai khubor hadien ba la iakynduh ia u Director ka NEIGRIHMS mynhynnin ka sngi.
Ka KSU ka la dawa ba dei ban weng noh ia ka jingbuh kyndon tang kiba 30 snem kiba lah ban apply kam hynrei ban buh haduh 35 snem. Kawei pat ka jingdawa ka KSU ka long ba dei ban bhah 20 percent ia ki shynrang bad 80 percent ia ki kynthei namar ba ka jingailad ia ki shynrang ban long nurse kam long ka bym itynnad bad bun ki Nurse shynrang kiba la wan ki dei na Rajasthan kaba long pynban ka jingiwit khlem ka jingtbit.
Ka la dawa ruh ba dei ban weng ia ka jingbuh kyndong ban apply tang kito kiba la trei ne shemphang na ki jaka sumar kiba 50 jingthiah bad ia ka jingthep kam dei ban leh da ka offline mode. Ia ka roster ruh dei ban bishar biang bad dei ban pynthikna ia ki kam kiba sahteng ne backlog.
Ka KSU ka la dawa ruh ba dei ban pyndam noh ia ka bhah OBC ha ka Group B bad C ha Meghalaya namar ba kam don OBC satia bad kumjuh ka jingbhah kam ia ki Schedule Caste dei ban mang tang 1 percent ha ka group B kumba la bhah ha ka group C katkum ka jingbun ki nongshong shnong bad ka jingbhah kam 27 percent ia ki OBC ha ka group B bad 5 percent ha ka group C dei ban pynphai biang sha ki Scheule Tribes ka Meghalaya ba kynthup ia ki Khasi-Jaintia bad Garo.
Ka la dawa ruh ba dei ban bishar ia ka jingthungkam ha ki snem ba la dep katkum ki mat ba la kdew bad ban pynbeit kumba ka long.
Phi don ban ong eiei?