Shillong: U Myntri Rangbah ka Jylla Conrad K Sangma ha ka sngi Balang ula kyrpad ïa ka Sorkar Pdeng ba kan aipor hynriew bnai ïa ka Jylla ba kan pyndep ïa ka jingpynrung kyrteng ban pynïasoh ia baroh ki nongïoh ïa ka Supplementary Nutrition Programme (SNP) lyngba ka Aadhaar bad eKYC nalor ka Facial Recognition System (FRS).
Ha ka shithi bala phah sha ka Myntri ka Women & Child Development Annapurna Devi, u Conrad ula ong, “Ka jingsdang ban pynrung ïa ka eKYC bad ka jingring ïa ka durkhmat ha ka kor, kala dep sdang shaid shaid. Namar kata, nga kyrpad ban aipor ïa ngi hynriew bnai ba ngin lah ban pynrung bad pynïasoh ïa baroh ki nongïoh jingmyntoi lyngba ka Aadhaar bad eKYC bad FRS, ki ban long ka jingïarap kaba khraw ban ai sha ka Jylla”.
“Nga kyrpad ruh lada ailad ïa ka Jylla ba kan lah ban buh kynthup lang ïa baroh ki MPR beneficiary ba la register ruh ba kin ïoh ïa ka SNP tad haduh katei ka por,” ula bynrap.
Haba pynpaw ïa ka jingeh ba ïakynduh da ka Jylla haba ïadei bad ka Supplementary Nutrition Programme (SNP), u Conrad ula ong bad katkum ka MPR data, ka Jylla ka don haduh 5,85,254 ngut ki nongïoh jingmyntoi hynrei hapoh ka POSHAN TRACKER tang 4,00,572 ngut ki dei kiba nongïoh jingmyntoi ba la register hapoh ka POSHAN 2.0. Kane ka mut ba 1,84,682 ngut kila shah ieh.
Ha kajuh ka por, u Myntri Rangbah ula pyntip ba ka Sorkar Jylla ka la nang pyrshang borbah ban pynrung Aadhaar bad seeding ïa kine ki nongïoh jingmyntoi. Ka jingthied ïa ki smartphone ïa ki nongtrei Anganwadi kala don ha ka bynta kaba khatduh eh ban pyndep, ula bynrap.
Phi don ban ong eiei?