Pan pisa u lamphang Jylla, na u lamphang Lok Sabbha, ban tei dep ia ka iing dorbar kaba 141 klur

Shillong:U Bah Metbah Lyngdoh, lamphang dorbar Jylla, ula pan pisa na U Om Birla, lamphang ka Lok Sabbha, na ka bynta ban tei ia ka iing dorbar thymmai ha Mawdiangdiang.

Ka dor jong katei ka jingtei ka long 141 klur bad ka dor jong ka tender ia ka jingtrei ka long 127.76 klur.

Katei ka iing dorbar, kaba la don 125 snem ka rta, ka la pluh ha u snem 2001 bad hadien kata ka jylla, kam don ia ka iing dorbar, la ka jong. La ong da u lamphang dorbar jylla, ba ka thong, ka long ban pynlong ia ka dorbar mang tyngka ha u snem 2022, kaba dei ruh ka snem jingdap 50 snem jong ka dorbar Jylla, tangba katei kan lah ban urlong, lada jia ba ka jingtrei ka iaid katba kum ka jingthmu.

U lamphang dorbar, u don mynta ha Kevadiya, Gujarat, ha kaba u shim bynta ha ka jingialang jong ki Presiding Officers, kaba sdang naduh mynta ka sngi. Ha ka dorbar, u kren halor ka jing ia trei lang ryngkat ka iing dorbar, ka sorkar bad ka kashari bad ula iathuh lyngkot ruh ia ka jinglong ka khlam covid ha ka Jylla. La plie ia katei ka jingialang, da U Ram Nath Kovind, President ka Ri. Ka thong jong katei ka jingialang, ka long halor ka mat kaba la ai kyrteng “Harmonious coordination between Legislature, Executive and Judiciary – Key to a vibrant democracy.”

U M. Venkaiah Naidu, Vice President ka Ri, U Om Birla, lamphang ka dorbar Lok Sabha bad ki lamphang na ki dorbar jong ka ri, ba kynthup ia U Bah Metbah Lyngdoh, lamphang ka dorbar Jylla bad U Timothy D Shira, lamphang dorbar khynnah, ki don lang ha katei ka jingialang.