Pan map u myntri PWD na u MLA ka Chokpot

Shillong, 12 Jylliew:
U Myntri ka tnad PWD u Bah Sniawbhlang Dhar u la pan map ha iing dorbar mynta ka sngi ia u MLA ka Chokpot u Clif ford R Marak hadien ba u byrngem ban wanrah da ka privilege motion namar ba u myntri u la ialam ba kla ia ka iing dorbar da ka jingtip kaba bakla.
U Marak haba wan rah ia ka jingkylli halor ka jingshna ia ka surok na Chokpot sha Daramgre, u la kwah ban tip la ka sor kar ka moramot ne em bad na ka liang u myntri u la ong ba ka sorkar ka moramot. Hynrei na ka liang u Marak uba dei u MLA ka thain u la ong ba u myntri u la ialam bakla namar ba ia kane ka surok khlem moramot satia la bun snem mynta.
U Bah Dhar u la iathuh ba la moramot ia kane ka surok ha u snem 2013-2014.
Hynrei halor kane, u MLA ka Chokpot u la ong ba u myntri u la ialam bakla ia ka iing namar ba ym don dak eiei ba moramot ia kane ka surok la bun snem.
“Nga dawa ba u myntri u dei ban panmap halor kane ka jingai jingtip bakla, lada phim pynap ngan rah da ka privilege motion pyrshah ia phi”, la ong u Marak.
Halor kane ka jingbyrngem u MLA ka Chokpot, u Myntri u la ong ba lada ka jubab ka long kaba bakla, nga kloi ban panmap.