Pan map hapoh 1 taiew, lym kumta ka KSU kan leh da kaba tyngeh

Nongpoh: Ka KSU, North Khasi Hills District ha ryngkat ka KSU Western Ri Bhoi Border, mynta ka sngi ki la iakynduh lang bad ki nongialam ka Meghalaya ASHA Worker Union ha Nongpoh, na ka bynta ban iakren halor ka phang ban pyrshah ia ka jingthmu jingweng kam jubor da ka Dorbar Shnong Nongsier Jirang, ia kawei ka nongtrei ASHA hapoh katei ka shnong.

Ha ka jingiakyn duh hapdeng ki KSU bad ki nongialam ki ASHA ha Nongpoh, ki la shim ia ka rai ban dawa jingpynshai na ka Dorbar shnong Nongsier, halor ki jingkynnoh ka Dorbar Shnong pyrshah ia ka seng, namar ki nongialam shnong ka Nongsier, ki la kynnoh ba ka KSU ka dei ka nongpynklumar shnong bad ba ka seng ka donkti ha ki kam beain bad katei ka jingkynnoh ka la mih hadien ba ka KSU Western Border Area ka la leit ban kyrshan ia kawei na ki nongtrei ASHA, kaba la ieng halor ka nongrim kaba biang bad ban iada na kawei ka samla lud ba don jingduna dkhot met bad kaba la shah leh beijot ha uwei u briew na katei hi kajuh ka shnong.

Ha kane ka sngi la don lang ruh naduh u President ka KSU, North Khasi Hills District Unit, u Samla Ferdinald Kharkamni, u President ka KSU, Western Ri Bhoi Border, u Samla Receive Pator, ki nongialam ka seng ki ASHA ba la lamkhmat da ka Kong Mira June Marsing kum ka Secretary bad la don ryngkat lang ruh ka Kong Imshida Thangkhiew, kaba la shah weng kam ha ka shnong Nongsier Jirang tang namar ba ka iarap ïa kawei ka samla ba don jingduna dkhot met halor ka jingshah thombor jongka pyrshah ïa u ba haing jong u Sordar Shnong katei ka Shnong Nongsier Jirang.

Haba iadei bad katei ka jingshah kynthoh pyrshah ia ka KSU, u Samla Pator u la ong ba katei ka jingkynnoh katei ka Shnong, ba ka seng ka don bynta ha ki kam beain bad ruh ba ka tuklar ia ki kam shnong, ka dei kaba la shu kren laplah da utei u nongialam Shnong ka Nongsier Jirang bad ka daw hi ka dei tang namar ba ka seng ka la leit ban iarap ia ka Kong Imshida Thangkhiew, ka nongtrei ASHA bad kaba ka shnong ka la thmu ban wengkam noh ia katei ka longkmie.

Wat na ka liang ka Kong Imshida Thangkhiew, ka la pynshai da kaba ong ba kam don kano kano ka daw ba ka la leh bakla ha ka jingtreikam kum ka ASHA bad katei ka jingthmu wengkam ia ka, ka dei hi tang hadien ba ka la leit ban iarap ia ka Samla ba duna dkhot met ban pynujor ejeher halor ka jingshah thombor jongka ha uwei u ba haing hasem jong u Sordar katei ka shnong Nongsier Jirang.

Katba na ka liang u Samla Ferdynald Kharkamni, President ka KSU, North Khasi Hills District, u la ong ba ka seng KSU ka la rai beit ban kyrshan ia ka Kong Imshida Thangkhiew bad ruh ka seng ka la tih bniah shuwa pyrshah halor ki kam thombor ka shnong Nongsier Jirang bad kumjuh ruh ka seng kan kyrshan ia ka samla ba shah thombor ha u runar na katei ka shnong.

Namarkata halor ka jingkynnoh da ki nongialam shnong ka Nongsier Jirang, kaba la kynnoh ba ka KSU ka don bynta ha ki kam beain bad ruh ba ka tuklar ia ki kam shnong, ka seng ka dawa ba ka shnong ka dei ban pynshai mardor hapoh shi taiew bad lada kam lah ban ai ki sakhi satar kumba la kynnoh, ka seng kam banse ban leh da kiwei ki lad ki lynti halor kane ka jingpynjah burom ia ka seng, u la bynrap.