Pan ka Meghalaya T. 1 lak hajar klur, na ka 16th Finance Commission

Shillong:Ka sorkar Meghalaya kala pan pisa T.1,14745 klur na ka 16th Finance Commission na bynta san snem kaban wan.

Ki tnad ba ka sorkar jylla ka la pan pisa ki long ka tnad ka rep ka riang T.1,652 klur, ka tnad jngohkai T.3,600 klur, ka tnad surok T.14,750 klur, bording T.6,207 klur, tnad sor klur T.4,820, tnad sam um T.4,122 klur, tnad khlaw bad pynneh mariang T.923 klur, ka tnad ka koit ka khiah T.1,880 klur, ka tnad pule puthi T.1,940 klur, ka tnad Private Sector Development T.500 klur, Youth Engagement T.1,607 klur, bad ka tnad Improving Standard of Administration T.1,250 klur.

Kiwei pat ki long ka Pre-Devolution Gap T. 69,324 klur, ka jingpynkhlaiñ ia ki kompeni ka sorkar ne ki state public sector T.500 klur, Grant ia ki District Council, Municipal T.1,670 klur.
Ia kane ka jingpan pisa katkum ka jylla, la rah ha ka kynhun ka 16th Finance Commission kaba la iakynduh ia ka sorkar jylla mynta ka sngi, ha kaba u myntri rangbah ka jylla u Conrad K Sangma lem bad ki myntri sorkar bad ki ophisar kila kynduh ia ka Commission kaba lam khmat u Chairman u Dr. Arvind Panagariya.

Ha kajuh ka por, u Chairman ka 16th Finance Commission u Dr. Arvind Panagariya ula ong ba ka thong ka Meghalaya ban kot sha ka 10 billion US Dollar ha u 2028 ka lah ban urlong tangba kam long kaba suk bad ka sorkar jylla ka hap ban durut tyngeh.
Haba kren sha ki lad pathai khubor mynta ka sngi ha Shillong, u Dr. Arvind ula ong ba ka thong ka jylla ka lah ban long tangba ka donkam ruh ia ka polisi kaba khlaiñ halor kane.
Ha kane ka sngi, u Chairman ka Commission ula ong ba la ioh sngew ia ki kam kiba ka sorkar Meghalaya ka la leh bad ki jingdonkam jongka.
Ula ong ba ia mynta ka kamram ka Commission ka long ban shu wan shim bad sngap ia ki jingmut na ki jylla bapher bapher halor ka jingbhah ia ki khajna kiba ioh na ka sorkar pdeng bad kawei pat ban bhah ia ki khajna hapdeng ki jylla, bad hadien kane, ka Commission kan sa shim ia ka rai.