Pan ka High Court, ka kaiphod CBI, HLSC bad ki mark ki kandidet

Shillong, 22 Jymmang:
Ka ïing Kashari High Court mynta ka sngi ka la pan lut ia ka kaiphod jong ka Central Beaureu of Investigation (CBI) halor ka jyrsieh thungkam nonghikai LP skul ha ka jylla, ka kaiphod jong ka High Level Scrutiny Committee (HLSC) ba thung ka sorkar, bad ruh ia ki mark ba ioh ki kandidet ba ialeh ia Ka eksam thungkam Nonghikai.
Kine mynta kin don ha kti ka High Court hadien ba kam shym la hun ia ka rukom bishar bniah ba la leh da ka High Level Scrutiny Committee ba la khlieh da u Commissioner ka tnad kam pohiing u Bah EP Kharbhih
Ka jingbishar halor kane ka kam kan bteng lashai Ka sngi Ka 23 tarik Jymmang, la ong u nongiasaid ain jong ki Nonghikai ba shah pyndam sialieh u MF Qureshi haba kren mynta Ka sngi.
Ka jingbishar hynne ka sngi ka la long ar sien ha ka por mynstep bad la bteng biang ha ka por 2 baje halor kane Ka kam.
Ka High Court Ka la takrain ia ka High Level Scrutiny Committee kaba khlem leh thikna ia ka rukom bishar bniah ia ki kandidet ba la ialeh ia ka eksam kam nonghikai namar ba ka shu bishar tang ia ki kandidet kiba la shah jied katba kam shym la shim ne bishar ia ki kandidiet kiba khlem shah jied.
“Ngam lah ban kren eiei ia mynta namar ba ka jingbishar kan bteng lashai ka sngi”, la ong u Qureshi.
U la ong ba ka Kashari High Court ka la takrain ba ka jingleh kane ka High Level Committee ka long ka bym bit satia namar ba kam don ki stad ki riewshemphang kiba khot nabar ka sorkar hynrei la don tang ki briew sorkar suda.
Ha ka kaiphod tohkit ka CBI, na ki 350 ngut ki kyrtong ba iakhun ia ka kam nonghikai LP skul kum ki Assistant teacher, 255 ngut la ai jingthoh da ki MLA ban thungkam ia ki.