Nongpoh, 18 Jylliew:
Ki katto katne ki nongkyrshan u MLA ka Mawhati Constituency, u Bah J.K Dorphang, ki la pynpaw ia ka jinglyng ngoh halor ka jingmih khubor ha u Rupang ha ka 16 tarik Jylliew 2014, kaba ong “Shah rong lyer ka ïingmane” jong ka Ba lang Katholik kaba don ha ka shnong Sohliya, Raid Iapngar, Ri-Bhoi district.
Ki nongkyrshan ki la pynpaw ia katei ka jingmih khubor ba ki sngewlyngngoh ba ka jingkynnoh jong ki nong pyniaid ia kane ka kam ba ki la leit kyrpad ia u MLA ka Mawhati, u Bah J.K Dorphang, hynrei um shym la pynioh ei ei ia ki lad jingiarap.
Na ka liang ki nongkyrshan u MLA ki kwah ban ioh ia ka jingshai ha kano ka tarik ba ki nongpyniaid ia katei ka ïingmane ki la leit kyrpad jingiarap na utei u MLA namar katkum ka jingtip jong ki ka long ba ym shym la don satia mano mano ruh ba leit mih sha utei u MLA bad ai jingtip ruh ia u halor katei ka jingshah rong lyer katei ka ïingmane kumba ki la kynnoh.
Ki la ong ruh ba ki dap da ka jingsngewkhia ban iohi ba kum kine ki jingkynthoh kin mih ha ki lad pathai khubor khlem da tip ia ki jingshisha namar u MLA ka Mawhati ha ka por ba um pat long MLA u la pynnoh ia ki jingiarap sha katei ka ïingmane ka Balang Katholik kaba imat kitei ki nongialam ki la klet ia kita ki kam ba bha ba u la dep leh.
Kawei ruh, u MLA ka Mawhati um ju kwah ban pynpaw kot khubor kat ha ki kam ba u la ai jingiarap, hynrei ka shong ha ki paidbah ban sngewthuh hi bad ki nongkyrshan ki kyrpad ruh ia ki kynhun bapher bapher ban iatreilang bad u MLA na ka bynta ka jingbit jingbiang jong ka Konstitwensi hi baroh kawei nangne shakhmat.
Phi don ban ong eiei?