Pan jingmut U DC ba pyrshah ki sengbhalang, ia ka NPR

Shillong, 10 Nohprah:
U Deputy Com mssioner ka East Khasi Hills district u la ai jingmut ia ki nongialam sengbhalang kynthup ka KSU bad ka FKJGP ba kin ai ia ki jingmut jongki kumno ban pyntreikam ia ka National Population Register (NPR).
“Ngi la ai jingmut ia ki ar tylli ki sengbhalang ba kin ai da ka jingmut khnang ba ngin lah ban poi sha ka jingiasngew thuh jingmut ha kaba iadei bad ka jingpyn treikam ia ka NPR,” la ong u Deputy Commissioner u Sanjay Goyal, hadien ba la wai ka jingialang bad ki seng bhalang mynta ka sngi.
U DC u la ong ba u sngew burom ia ka jingai jingmut jong ki seng bhalang bad ki bor syn shar shnong halor kane ka mat.
“ Hynrei ha kajuh ka por, nga kwah ban ban jur ba ka jingrejister ia ki briew ha ka NPR kam shym la ai ia ka hok nongshong shnong kumba la pyrshah ki sengbhalang. Kane ka dei tang ka jingsngewthuh bakla”, la ong u Deputy Commissioner. U la ong ba ka jingpyntreikam ia ka NPR ka dei kaba hap ban leh beit bad namarkata, donkam ban wad da kiwei ki lynti ban pynlait na ka jingeh bad ka jingsngewthuh bakla.
“ Ka NPR ka dei u number kaban pyni lyngba ka Aadhar unique identification number (UID),”, la ong u Goyal.
U Deputy Commissioner u la iathuh ba ki la thoh ka shithi sha ka Synjuk Ki Rangbah Shnong ban iakren bha halor kane ka kam ban lait na
ka jingsngewthuh bakla.
“Ngim pat ioh ia ka jubab na ki”, la ong u DC. U Goyal u la ong ba kin iakynduh biang bad ki sengbhalang ban iakren bha halor kane kam ban weng noh ia ka jingsngewthuh bakla.
Ha kawei ka liang, u General Secretary ka KSU u Bah Auguster Jyrwa u la ong ba kin khot ia ka jingialang bad ki rangbah shnong ban iakren halor kane ka kam bad ban twad jingmut ia ka jingsngew jongki.
U la ong ba u Deputy Commissioner u kwah ban pyntreikam ia ka NPR mardor. U Bah Jyrwa u la ong ba u Myntri Rangbah u la pdiang ba kin pynsangeh shwa ia ka jingpyntreikam ia kane ka NPR ha ka jingiakynduh bad ki sengbhalang ha ka 19 tarik Naitung 2013.
U la iathuh ba ki la ai jingmut sha ka sorkar ban kyrpad ia ka sorkar pdeng ba kan pynkylla ia ki kyndon kaba iadei bad ka jingpyntreikam ia kane ka NPR. “Ngi la tip ba ka jylla Meghalaya ka don ki khappud bad ka Bangladesh bad ka Assam, kan don ka jingma lada pyntreikam ia kane namar ba ki briew kiba nabar kin ioh rung pynban kum ki nongshong shnong”, la ong u general secretary ka KSU.
U la ong ba ka sorkar ka dei ban peit ia kane ka jingma shwa ban pyntreikam ia ka NPR ha kane ka jylla.