“Pan jingmut ia kiwei ki Bill, ym ia ka Tenancy Bill”

Shillong, 25 Naiwieng:
U chairman ka Mait shaphrang Movement u Bah Michael N Syiem u la ong ba ka sorkarjylla ka la thaw ia kawei pat ka nongmuna da kaba khot ia ka jingai jingmut jong ki paidbah halor ka Meghalaya Regulation of Landlord and Verification of Tenants 2013 shwa ban leit rah ha Assembly.
“Kane ka dei ka sien ba nyngkong ba kan jia ha kane ka jylla”, la ong u president barim ka KSU haba kren ia ki nongthoh khubor hynne ka sngi.
U la ong ba ka sorkar jylla ha ki snem ba la dep, kam ju leh kumne shwa ban thaw ia ka ain ha kane ka jylla.
“Ka sorkar kam shym leh ia ka Lokayukta Bill ban pan jingmut na ki paidbah kumba leh ia ka Tenancy Bill bad ka long kaba sngewsih ba la pas ia ka khlem kano kano ka jingpynkylla”, la ong u Bah Syiem.
U chairman ka MSM u la ong ba ka sorkar kam ju pynlong ia ka jingialang paidbah haba wanrah ia ka Forest Act.
“Nga sngew ba ka sorkar ka dei ban leh kumjuh ia kiwei ki ain kumba leh ia ka Tenancy Bill ha ki sngi ban wan. Kane ka jingleh dei ban bteng ha ki sngi ban wan ia kiwei ki ain”, la ong u Bah Syiem.
Ha kajuh ka por, u Bah Syiem u la ong ba ka sorkar ka donkam ban thaw ia ki ain kiba biang ban tehlakam ia ka jingwan ki briew nabar sha kane ka jylla.
‘Ha nga shimet nga sngew ba ka ILP marwei kam lah ban tehlakam haduh katta ia kane ka jingwan briew nabar. Ngi donkam ban pyrkhat ban wanrah da ki atiar ba khlain ban tehlakam ia kane ka jingwan ki briew nabar,” la ong u Bah Syiem.