Pan jingkyrshan ka VPP, na ka bynta ka MDC bad MP ilekshon

Shillong:Ka Voice of the People Party (VPP) ka pynpaw ïa ka jing sngewnguh ba khraw ïa ki paidbah ba la kyrshan ïa ka Party ha baroh kawei ka jylla.

“Ka jingkyr shan ba radbah ka jong phi ka la kren briew ha ka kam saiñ hima jong ka jylla Meghalaya ha kaba sawngut na ki kyrtong jong ka Party ki la ïoh ban long ki dkhot ka Ïing Dorbar Thawaiñ ka Jylla ban wanrah ïa ki mat ki jura jong ka jaitbynriew bad jong ka jylla hi baroh kawei,” ong ka kyrwoh na ka VPP.

“Shuh shuh ka jingkyrshan jong phi ïa ka Party kaba ïeng skhem halor ka nongrim jong ka Saiñ hima bad ka synshar paidbah kaba khuid bad ba shisha ka ai ïa ka jingkyrmen ba ha kawei ka sngi ka Meghalaya kan long ka jylla ban ai nuksa ïa kiwei pat ha ka synshar ka khadar kaba bha ïa kaba ngi lah ban sngew sarong. Kumta, na ka liang ka Party ngi khot ngi wer ïa phi ban ai ka jingkyrshan ïa ka Party ha kane ka ilekshon MDC and MP ki ban sa long ha u snem 2024. Ha kane ka bynta, nga kwah ban pynshai ba haduh mynta na ka liang ka Party ngim pat shim ka rai ïano ban pynïeng kum ki kyrtong ha kine ki ilekshon; ïa ki kyrtong yn sa rai bad pynbna ha ka por kaba biang,” ong u Dr. Batskhem Myrboh, U nongaiktien ka VPP.