Pan jingkyrshan ka samla Bateithymmai Nongrum na ki paidbah ka Jylla

Nongstoiñ, 27 Iaiong:
Ka samla Bateithymmai Nongrum, kaba dei ka samla na ka shnong Umthied Bynther West Khasi Hills District, kaba la poi ruh sha ka Grand finale jong ka “Yes I Am”, ka prokram Reality show kaba heh hapoh ka ri India mynta ka sngi ka la hiar sha ka sor Nongstoiñ ha ka jingialang bala pyniaid da ka seng HYC Nongstoiñ Circle hapoh madan New Nongstoiñ ban pynsngew ia ki Sur jngrwai kiba bang ba thiang sha u paidbah ka thain bad ruh ban pan jingkyrshan na ki paidbah lyngba ki vote khnang ba in ioh ban khur ia ka jingjop ha ka jingiakop Grand Finale ka ban sa long shen.
U samla Lumlang Kharsyiemlieh President jong ka seng HYC Nongstoiñ Circle haba ai jingkren ha katei ka jingialang u la ong ba ha u snem 2007 ki paid Khasi, ki la shongshit palat pud ia u Amit Paul u ba la mih na ka jylla ban iakhun ha ka Indian Idol, namar kata katno dei ban sngew sarong khamtam haba ka samla Khasi, kaba dei na ka doh ka snam lajong kan poi shaduh ka Grand finale jong ka “Yes I Am”, ka prokram Reality show na Mumbai.
Ha shwa ba ka samla Bateithymmai, kan shim ia ka bynta ban rwai ka la pynpaw ruh ia ka jingangnud ban kheit ia ka jingjop lane ban wan shakhmat duh ha katei ka jingiakop, bad ha kajuh ka por ka la kyntu ruh ia ki paidbah nongshong shnong Nongstoiñ ba kin kaba ai ia ki vote jong ki da ka plie ïa ka Facebook Page ‘Yes I Am’ bad lyngba ka account jongka, ka lah ban ai vote tang da kaba shu thoh BATEITHYMMAI NONGRUM bad lah ban thoh bun bun sien lane katno katno sien ruh.
Khatduh eh ka Samla Bateithymmai, ka la ioh ruh ban pynshong shit ia ki paidbah ka thain lyngba ki sur jngrwai kiba bang bad ka la rwai ruh ia shibun tylli ki jingrwai Hindi kiba la paw nam bha kynthup ruh ia kawei ka jingrwai Khasi ia kaba ka la shna hi.