Pan doktor ha CHC Bhoirymbong

Shillong, 25 Jymmang:
Ka Hynñiewtrep National Youth Front (HNYF) na Ribhoi District ka la pan doktor shuh ha CHC Bhoi rymbong namar ba duna palat ki doktor.
Ha kane ka sngi Thohdieng hadien ba ka la ioh ia ka jingujor na ki paidbah ia ka jingbym biang ki doktor bad ka jingbym poi trei thikna ki doktor ha Bhoibymbong CHC, ki nongialam ki la leit iakynduh markhmat ia u Director Health Services (MI) ha ryngkat ka jingia donlang ki nongialam ka KSU Mawkneng Unit bad ka RBYF Mawkneng Unit ba kynthup ia u Bah W Shylla dkhot ka HNYF, u Bah S Rynghang Finance Secretary RBYF Maw kneng Unit,u Bah B.Mu khim President ka KSU Mawkneng Unit.
Kine ki nongialam Sengbhalang ki la ong ba ar ngut ki doktor MBBS uwei na ki doktor MBBS u wan trei katba uwei u doktor ym lah ban wan trei na ka daw ba u dang jingshitom bad dei tang une u doktor uba ai dawai homeopathic uba ju wan trei tista bad sumar ia kiba bun ki nongpang.
Kumba sawphew tylli ki shnong bad sanphew hajar ngut ki paidbah kiba hap hapoh ka jingpeit jingkhmih jong kane ka CHC bad tang uwei u doktor um lah satia ban ai ia ka jingshakri ba paka sha ki paidbah bad bunsien ki paidbah ki hap ban ap bun kynta tang ban ioh jingsumar wat haba ki iakynduh ia ki khep ba ki don ki nongpang kiba donkam ia ka jingsumar kaba kham kloi ruh ki hap beit ban ap.
“Ka jingbym biang ki doktor ka la buh jingeh ia ki paidbah kiba kiba wan na ki longing kiba duk bad kim lah satia ban leit shah sumar sha ki hospital shimet bad bun na ki, ki shaniah beit ha ka jingioh jingsumar na ka Hospital Sorkar,” la ong u Bah A. Jyrwa, General Secretary ka HNYF.
U Dr A Dkhar, DHS (MI) u la kubur ba ka long kaba shisha ba kat ka jingheh jong ka Bhoirymbong CHC, ka la donkam kham bun ki doktor na ka bynta ban ai jingshahkri sha ki paidbah bad ha kajuh ka por. U Dr Dkhar u la kular ban phah sa arngut ki doktor sha katei ka CHC.
Ka seng ka kyrpad ia ka tnad ka koit ka khiah ba kan phah sa sawngut ki doktor ha kane ka CHC na ka bynta ban kham iaid bha ki kam ki jam bad kumba ka long mynta ka ju don ki jingjia aksiden ba manla ka por naduh ba la plie ia ka surok Shillong Byepass te kumta donkam ban don bun ki doktor ha kane ka CHC.