Pan biang ka KHADC ia ka Land Bill, na ka sorkar ba bun ki jingduna

Shillong: Ka Khasi Hills Autonomous District Council (KHADC) ka la rai ban pan biang noh ia ka Khasi Hills Autonomous District (Allotment, Occupation or Use or Setting Apart of land) Bill 2014 ba la phah da ka Council kham mynshwa sha ka sorkar ban ioh ia ka jingmynjur u Lat, namar ba ka lap ba don bun ki jingduna.
Haba kren sha ki nongthoh khubor, u Executive Member (EM) ba peit ia ka khyndew u bah Titosster Well Chyne ula iathuh ba ka Land Committee kaba ula khlieh kum u chairman, ka la shong jingialang mynta ka sngi ka la rai ban thoh ban kyrpad ia ka sorkar ban pynphai noh shwa ia ka Bill khnang ban ioh ban pynbha ia ka da kaba bsuh da ki kyndon ba kham biang.
U bah Titosster ula iathuh ba naduh ba phah ka Council ia kane ka Bill naduh 2014 kam shym la ioh jubab eiei haduh mynta.
“Ngi la aiti ha u bah RS Wanniang bad bah A Shangpliang ban pule bniah ia ki jnit ki jnat ba donkam ban bsuh shuh ia ki kyndon ban pynkhlaiñ ia kane ka Bill”, la ong u bah Titosster.
Ula iathuh ba hadien ba la long ain kane ka Bill, kan iarap ha kaba ka Council kan kham don bor ban pyntreikam ia ka bor ha kaba iadei ka jingbuh dulir ia ki jaka da ki briew ha ka Council, ka jinglong trai, ka jingaiti ne pynkynriah ia ka kyrteng halor ka jinglong trai halor ka khyndew ka shyiap bad kiwei.
Katkum u EM, tang shu ioh na ka sorkar, yn sa shong pyrkhat biang ban pynjanai shwa ban rah pat sha ka dorbar ban mynjur.