Palat T.600klur bei ka sorkar UP, na bynta ka bha ka miat ki masi

Ka sorkar jong U Yogi Adityanath, myntri rangbah ka Uttar Pradesh, ka la mang pisa mynta ka sngi, haduh 600klur, na ka bynta ban peit ia ka bha ka miat jong ki masi ha katei ka Jylla. Kane ka rai ka long ar shah, na kaba la mang pisa ha u snem ba ladep.

Katei ka pisa, haba khein lang, ka long T.613 klur, kaba dei na bynta ka bha ka miat jong ki masi bad T.165 klur, la shim na ka khajna jong ka kyiad, ha kaba yn sumar ia kito ki masi kiba don ha ka jingtlot namar ka jingduna ka bam ka sa jongki bad sa T.248 klur, yn bei tyngka, na ka bynta ban thaw ia ki jaka sah jong ki masi ha ki nongkyndong bad nangta sa T.200klur ha ki jaka sor.

Ha ki khyndiat bnai ba ladep, ki la don bun bah ki nongrep, kiba la khih bitar jur, namar kitei ki masi, ki bym don nongsharai, ha kaba ki leit bam lut ia ki jingthung jingtep jongki bad ia kitei ki masi, la leit set ha ki iing sorkar, ha ki skul bad ki iing dorbar shnong bad katei ka la pynthut ia ka jing pynlong skul ha kiba bun ki jaka.