Palat T. 1 klur ioh ka Mylliem ban iada shlei um sha ki pynthor

Shillong, 28 Jylliew:
Ka shnong Mylliem ka la ioh palat T. 1 klur tam na ka tnad Water Resources na ka bynta ban iada ia ka jingshlei um ha ka thaiñ Mylliem bad ka jingtrei ia kane, kan sdang noh shen.
Ia kane ka skhim la urlong hadien ba u MLA ka Mylliem u Bah Ronnie V Lyngdoh ryngkat ka jingiatreilang bad ki bor shnong bad ki paidbah ka thaiñ Mylliem ki la wad lad ha kine ki snem ba la dep.
U Rangbah Shnong ka Madan Iing Syiem, Mylliem u Bah Hampher Khyriem u la iathuh ha ki lad pathai khubor ba ka jingioh ia kane ka skhim kan long ka jingkyrkhu ia ki paidbah katei ka thaiñ Mylliem kiba iakynduh jingeh man ka por namar ka jingshlei um ki lyngkha rep bad ka madan ialehkai.
“Ngi sngew ban ai khublei ia u MLA uba la shim khia ia kane ka kam hadien ba ngi la leit ud hakhmat jong u”, la ong u Bah Khyriem.
U la ong ba katei ka thaiñ ka ju jur bha ka jingshlei um ha ka por ba lyiur bad bunsien ki surok, ki lyngkha rep bad ki madan ialehkai bad ki iing ki sem ki shah ktah jur na ka jingshlei um.
Haduh mynta la dep khot tender kumba T. 50 lak tam bad ka kam, kan sa sdang noh shen bad ia kaba sah yn khot shuh hadien.
U la ong ba kane ka skhim na ka Water Resources kan khang lad ia ka jingshlei um da kaba ker kynroh khnang ba ka um kan ym iaid sharud na ka lyhuh.
Ha kajuh ka por u Bah Khyriem u la ong ba ka shnong Madan Iing Syiem, Mylliem ka la bthah ba ki paidbah kim dei ban leit skud jaka ban shna iing shna sem ha phut wah khnang ba kan ym wanrah kano kano ka jingeh haba iaid lynti ka wah.
“Ngi dei ban kiar na kaba shna iing hajan wah ioh ka wan jia kumba jia sha Uttarakhand”, la ong u Bah Khyriem ba la don lang ki riew rangbah jong katei ka thaiñ bad u MLA mynta ka sngi.
Ia kane ka skim la phah jingtyrwa sha ka tnad ha u snem 2010 bad ka la urlong mynta u snem 2013 bad khlem pep kan long ka jingmyntoi ia ki paidbah ka thaiñ.
Ha kajuh ka por, u MLA u Bah Ronnie u la ong ba ka long kaba bha ia ki paidbah ban kiar na kaba pynjot pathar ia ka mariang da kaba pom pathar ia ki dieng ki siej namar ba kane ka ktah ia ka jingmih ki umpohliew.
“Ngi don ka synjuk jong ki rangbah shnong ka thaiñ Upper Shillong ngi la dep iakynduh ia u Syiem Mylliem halor kane ka kam kumno ban thaw ia ki lad ki lynti ban iada ia kane”, la ong u Bah Ronnie.