Palat hajar ngut, ha ka ia mareh ka KJP Synod 2016

Shillong, 21 Nailar:
Palat hajar ngut ki paidbah ki la ïashim bynta ha ka Shillong Run 2016 ba la pyllong da ka Agency For Sustainable Development Initiatives jong ka KJP Synod Sepngi na ka bynta ban pynmih pisa ïa ki skul ba ka Synod ka la seng na ka bynta ki khynnah kiba duna ki dkhot met, ka Mairang Vidyojyoti Inclusive School, Sanshong, ka Rev Amirkha School for Disabled bad kumjuh ka Community Based Rehabilitation Programme bad ka Rev S Wollington Chil-drens Home, Nongpyn-deng.
U Bah HM Shangpliang, Director jong ka tnad Social Welfare ka sorkar jylla, u la long u Kongsan bad kaweh ïa ka lama ban pynsdang ïa kane ka jingïamareh, kaba la phiah na ka bynta ki Senior bad ki Junior bad kynthup ruh ïa ki khynnah kiba duna ha ki dkhot met.
Haba kren ha kane ka sngi, u Bah Shangpliang uba la sam ruh ïa ki Khusnam sha ki katto katne ki khynnah kiba jop, u la khot ïa ka jingïatreilang bad ka jingkyrshan lang baroh na ka bynta ban ïarap ïa ki briew kiba don jingduna ha ki dkhot met.
Nalor ka jingmareh bad ka jingsam ïa ki khusnam, la pynlong ruh ïa ka jingpynbyrngia ha kaba la ïoh ïa ki jingrwai pysngewtynnad ha ka kynhun nongrwai Gospel kiba na Mawlai, ka Action Song na ki khynnah skul ka Rev Amirkha for Disabled Mawlai, MVIS Mairang bad ka jingrwai na ka CBS Mairang.
Ha kane ka sngi la ïadonlang ruh ki Pastor jong ka KJP Synod.
Ki nongjop ha kane ka Shillong Run 2016 ki long Na ka liang ki Senior Men- Ba nyngkong u Maikhelsing Ramsiej, ba ar u Synsharlang Wahlang bad balai u JOmsingstar Ramsiej. Na ka liang ki Kynthei pat la jop da ka Pynhun Shullet, ba ar ka Kyntimon Marweiñ bad balai ka Dateibankynmaw Marweiñ. Na ka liang ki Junior shynrang la jop da u Stevenson Swer, ba ar u Donkupar Nongrum, balai u Joyfulness K. Wanniang. Na ki kynthei la jop da ka Aidaris Lyngkhoi, ba ar ka Phyrnai Kyndait, balai ka Evamerry Ramsiej. Na ka liang kiba duna ha ki dkhot met na ki shynrang la jop da u Shanbormi Suchiang, ba ar u Elastone L Mawlot, balai u Evermoon Wankhar. Na ki kynthei pat la jop da ka Maidensoben Lyngkhoi, ba ar ka Eiphang Rymbai, balai ka Suroi Dozo.
La ai prais kyrpang ruh ia i Bah Disil Nongrum, kum u nong iamareh ba tymmen tam bad i Larihun Dhar kum ka nong marahe ba khynnah tam. Baroh kiba jop ki ioh da ka Trophy, ka Pisa ryngkat ka Certificate.
Na ka liang ka Synod ka bthah ba kito kiba la iashim bynta lada ki kwah ia ki Certificate ki lah ban sms ia ki kyrteng jong ki ha kine ki number: 9863115981/ 9436302194.