Palat 7000 tylli ki Covid-19 Committee Centre, la thaw ha ki jaka nongkyndong bad ha ki jaka sor:Prestone

Shillong: Ka jylla mynta ka don palat 7000 tylli ki Covid-19 Committee Center, kata ka kynthup ia kiba na ki thain nongkyndong bad ha ki jaka Sor, ki ne ki Commitee kin peit ia ki nongshong shnong ki ba la wan phai na sha bar ka jylla bad kine ki Committee kin hap hapoh ka jingpeit jong ki Deputy Commissioner, ia ka ne la iathuh da Symbud Myntri Rang bah ka jylla u bah Prestone Tyngsong.

Haba iakren bad ki lad pathai khubor u bah Prestone u la iathuh ba haduh mynta ki nongshong shnong kiba la wan phai ha ka jylla ki long 6565 ngut bad kine baroh kin hap ban leh ia ka quarantine ha la ki jong ki shnong ki ba ki sah. U bah Prestone u la iathuh ba mynta la buh sa ar tylli ki jaka Screening na ka bynta ki briew ki ban wan phai kata ka long na ka bynta ki briew kiba na West khasi Hills District, kan long ha Mairang bad ha Nongstoin, na ka bynta kito ki ba dei na South West Khasi Hills District kin hap leh ia ka screening ha Byrnihat,Ribhoi District. Ha kine ki sngi ka sorkar ka la pynbun shuh shuh ia ki jaka screening, kata kawei ka jaka screening kaba ki la buh ka long ha ISBT Tura bad kane ka long na ka bynta ki briew ki ban rung sha West Garo Hills District, South Garo Hills District bad South West Garo Hills District .

Katba ka jaka screening ka ba don ha Bajengdoba kan peit tang ia ki briew ki ban rung ha North Garo Hills District bad East Garo Hills District .

Na ka bynta ki ba sah ha East Khasi Hills District, la buh ia ki jaka screening ha Polo Ground, Shillong.

Ka jaka screening ka ba don ha Byrnihat kan peit tang ia ki briew ki ban leit rung sha Ri Bhoi District bad South West Khasi Hills District, katba ia ki briew ki ban wan rung ha East Jaintia Hills District bad West Jaintia Hills District la pynkhreh ia ki jaka Screening ha Thadlaskein entry point.

Na ka liang u bah Prestone, u la ai khublei ia baroh kiba trei shitom bad ia snoh kti lang bad ka sorkar jylla, da kaba ki la trei shitom bad miet sngi bad ban peit ia baroh ki ba wan na kylleng ka ri India, khnang ba ka jylla kan lait na ka khlam Covid -19.