Jowai:Ka football ka dei ka syiem jong ka jingïalehkai haka jylla bad kane kala nang nang paw pyrthei haka jingpyrshang bad jied (Trail and Selection) ïaki khynnah ïalehkai kiba naduh ka rta kaba 7 snem haduh 13 snem shapoh kaba la pynlong da ka Jaiñtia Football Academy (JFA) ha madan Jrisaleiñ, Chutwakhu Jowai haka sngi Nyngkong.
Ha kane ka jingjied ïaki khynnah ïalehkai ban pynrung hapoh ka Academy (JFA) kila don haduh palat 70 ngut ki khynnah kiba la shah jied ba kynthup ïaka Under -10 (7-9 snem ka rta), Under-12 (10-11 snem ka rta) bad Under-14 (12-13 snem ka rta).
Kine ki khynnah dei kiba la wan na kylleng ki shnong kiba hap haka Laskeiñ, Thadlaskeiñ bad ki shnong kiba don hapoh ka sor Jowai.
Kane ka trail and selection kaba dei ka wat kaba nyngkong kaba la pynlong da ka JFA kan kut lashai ka sngi ha katei ka juh ka madan kaba kynthup ïaki kynthei bad shynrang.
U AFC ‘C’ License Coach, u Ryum Khonglah, uba dei ruh u General Secretary ka JFA, ka jingthmu jong ka JFA ban pynlong ïa kane ka trail ka dei naka bynta ban jied ïa ki khynnah ban hikai pyntbit ïa ki haka jingïalehkai football hapoh ka Academy naduh dangrit ka rta ban seng nongrim bad saiñdur ïaki jingïalehkai football jong ki.
“Ki don ki khynnah ïalehkai ba wan ha kane ka trail kidei kiba la don lypa ka sap kaba kyrpang wat haka rta kaba dangrit bad ka donkam sa tang ba ngin ai jinghikai ïa ki buit ïalehkai ba kin tyngshaiñ haka jingïalehkai football, kumba ka thong ka JFA ka angnud ban sei ïaki sap ba rieh kane ka District bad ka Rilum Jaiñtia baroh kawei.”
“Wat la ka dei ka sien kaba nyngkong baka JFA kala pynlong ïa kane ka trail, hynrei ka jingwan jong ki spah ngut ki khynnah kala ai mynsiem ïaka JFA baroh kawei bad ki kyrmen ba ki khynnah kynthei kin mih shakhmat ban wan sha ka trail kaba ngin pynlong lashai bad ha kiwei kiwei ki sngi kiba ngin sa khot kyrpang kham Haiden”, la ong u Organising Secretary ka JFA u Ma Mararki Patwet, uba long u Assistant Coach ka JFA bad udei ruh uwei na ki coach uba ïalam ïa Niaw Wasa Utd, ka kynhun lahduh ka WJDSA.