Palat 500 ngut yn tur ki Rangbah Shnong sha iing U Lat

Shillong, 15 Nailur:
Lashai ka sngi ka 16 tarik u nailur, 2015 ki Rangbah Shnong kin iaid paidbah jai jai tawiar ia ka iingsah u Lat ka jylla ka Raj Bhawan. Ki tyllong khubor ki la iathuh ba kin don palat ia ka 500 ngut ki Rangbah Shnong bad ki nongialam ki dorbar Shnong ki ban wan ban ia shim bynta ha katei ka jingiaid paidbah. Katkum ka jingkhein ba la ioh lum la ong ba katei ka 500 ngut kan dei lada ki Dorbar shnong kin sei duna briew hynrei lada kin sei kumba ki la ia kut 10 ngut na kawei ka Dorbar la antad ba ka jingpoi briew kan palat hajar ngut.
Ki lad khubor ki la iathuh ba tang mar ia ioh jingtip ia katei ka jingiaid Rally ki Rangbah Shnong u Lat ka jylla uba don shabar jylla u la wan her bak sha nongbah Shillong bad la ong ba mynta u la don ha Shillong bad ki lad khubor ki la iathuh ruh ba u Lat u lah ban khot ia kren ruh ia ki Rangbah Shnong lashai ka sngi ha ingsah jong u.
Katei ka jingiaid paidbah, ki Rangbah shnong kan sdang da ka jingiakynduh lang jong ki hakhmat ka All India Radio kaba don mar pyrshah ia ka ophis MBOSE ha ka por 11 baje shuwa ban sdang ka jingiaid paidbah. La ban kdew ba katei ka Rally ki Rangbah Shnong ka dei ka sienjam kiba la shim nyngkong eh ban pynpaw ka jingpyrshah ia ka jingpynslem u Lat ban mynjur ia ki bill ba la pas ka KHADC bad JHADC , ban pyrshah ia ka Ordinance, ban pyrshah ia ki jingthmu ka sorkar ban wanrah Draft Bill bad kiwei pat ki ain ha ka synshar khadar kaba hap ha ka sobjek ka District Council.