Shillong, 14 Jylliew:
Ka jylla Megha laya ka la mad bun bah ki jingjia ba shah leh sang jong ki nongtrei iing briew bad katkum ka jingong u MLA ka Nong thymmai u Dr Jemino Mawthoh, la don kumba palat 5 spah tylli ki jingjia kum kine ha kylleng ki jaka ha ka jylla.
Ha ka jingiasyllok kaba la pynlong mynta ka sngi da ka North East Domestic Workers Movement (NDWM), u Dr Mawthoh u la ong ba kum kane ka jingjia, ka nang jur ha kine ki sngi bad ym duna ia ka shi hajar ngut kiba la shah nion ha ka jingsiew.
U la iaroh ia ka National Domestic Workers Movement (NDWM), Meghalaya kaba la ieng ban iakhun ia kane ka jingshah ban bein jong ki briew naduh u snem 2000.
“Ka imlang sahlang jong ngi ka la kylla bad ka jingbanbein ka la nangjur ha kine ki sngi”, la ong u Dr Mawthoh haba jubab ia ka jingkylli jong uwei na ki nongiashim bynta ha ka jingiasyllok halor ka phang, “Thaw ain ia ki nongtrei iing bad ithuh ia ki nongtrei iing kiba pura” ba pynlong da ka National Domestic Workers Movement (NDWM),Meghalaya.
Katkum ka jingong u Dr Mawthoh bun bah ki jingkylla ha ki jaka sor bad kane ka long lyngba ka jingtrei borbah ka NDWM.
U la ong ba ka International Labour Organization (ILO) ka la ithuh ia ka jingnoh synniang ki nongtrei iing briew ha ka ioh ka kot ka ri.
“Lada ym don ki nongtrei iing briew, ka jingim jong ki longing ha sor kan ktah jur”, u la ong bad bynrap, ha sor, bun ki shijur ki treikam sorkar bad kiwei ki kam bad khlem ki nongtrei iing kan long kaba eh ia ki ban peit ia ki khun ki kti’.
Phi don ban ong eiei?