Palat 5 hajar ngut duh kam na ka jingkhang kyiad ka sorkar

Shillong, 06 Iaiong: 
Ka jingkhang ka sorkar ia ki dukan kyiad ha kane ka jylla, ka la ktah jubor ia ki trai nongdie, ki nongtrei bad kiba ioh jingmyntoi na kane ka kam.
    Haba iakren bad u dkhot bym kwah pyn paw kyrteng, ka East Khasi Hills Wines Dealers Welfare Association (EKHWDWA), u la iathuh ba ka jingdon jong ki briew ba shah ktah kam duna ia ka 5 hajar ngut na ka jingkhang syndet ka sorkar ia ki dukan kyiad.
      “Palat 5 hajar ngut ki la duh kam naduh ki nongtrei, nongshong dukan, ki jaka thep na ki bottling plant”, la ong une u dkhot ka WKHWDWA haba iakren bad u Rupang mynta ka sngi hadien ba la wai ka jingialang mynta ka sngi.
U la ong ba ka jingduh khajna ka sorkar ha ka shi snem, kam duna ia ka 200 klur ha ka shi snem na ka jingkhang ia ki dukan kyiad ha kane ka jylla.
  “Kumba 97 percent na ka jingdon ki dukan kyiad ha ka jylla, ki la shah khang lut ha kane ka jylla”, u la ong bad bynrap, mynta ruh ka jingkhang ka dang bteng shaid shaid.
   U la ong ba ki dukan kyiad kiba ba la buh naduh u snem 1941, 1948 ruh ki la shah khang kum ka Shillong Winestore ha Khyndai Lad, ka Mahari.
   Kine ki jaka ha ka por ba ki buh ia ka dukan, ym pat don skul, ym pat iingmane, bad wat ka surok ruh bad ki wan hadien.  ”Ka hukum ka sorkar ban khang lut, ka la ktah shi katdei eh ia ka kam ba ngi la im ja da ki phew snem”, u la ong.               
Ki don tang katte katto ki jaka ba lait kum ha Khliehiewduh, Rynjah, Happy Valley, Sawphurlong ha kane ka nongbah.
   U la lyngngoh ia ka ain ba la pyntreikam ka sorkar Meghalaya namar ba ha jylla Assam, ka sorkar ka pynjari tang hapoh 50 meter hynrei ha Meghalaya pat ki la pynjari haduh 200 meter.
      Ha ka jingshisha na ka liang, ka seng ka la dep iakynduh ia u myntri ba peit ia kane bad ban kyntu ban pyrkhat hynrei, la ioh jingtip ba u Myntri Rangbah ka jylla u Mukul Sangma um treh satia ban pyndem bad u la hukum ban leh beit.