Palat 40 ngut ioh MLA ka HSPDP, ha kaba kut sah sa tang u bah Hoping, ong U bah Pangniang

Mawkyllei:Ka seng sain pyrthei kaba rim tam ha ka jylla, ka Hills State People Democratic Party (HSPDP) ka la rakhe kynmaw burom ia u bah Hoping Stone Lyngdoh ha ka lyngkhuh sngi khlad kaba khyndai ha ka sngi palei, ha Mawkyllei, Eastern West Khasi Hills.

Ha kane ka sngi, ki nongialam ka HSPDP naduh u President bah K Plasting Pangngiang, u General Secretary bah Panbor Ryntathiang, u MLA bah Methodius Dkhar, ka President ka HSPDP Women Wing kong Badariti L Nonglait, kaba dei ka pyrsa u bah Hoping, ki nongialam ka HYC bad kiwei kila sakhi lang ban ai burom ia une u riew khraw ka jaitbynriew.
Ki nongialam kiba kren ha kane ka jingkynmaw burom ha jaka ba don u mot u bah Hoping ha phyllaw ka College, kila khlei ban bat bad buddien ia ki kyntien bad ki jingprat lynti u bah Hoping ban shakri ia ka jaitbynriew Khasi khlem sangeh haduh ba kin urlong.

U President ka HSPDP u bah Pangngiang u la ong ba ka jingpynbeit ia u pud u sam hapdeng ka Meghalaya bad ka Assam, ka jingkhang ban tih ia u uranium, bad kumjuh ka jingdawa ban pynioh ia ka Khasi-Jaintia State, ki dei ki mat kiba kham kongsan kiba u ma ieid Hoping ula ialam ha ki por ba u dang don ha kane ka pyrthei bad ka party kan dang iai buddien ia kine haduh kine ki sngi.
Ula pynpaw ia ka jingsngew bynniaw khyndiat namar ba watla ka HSPDP ka dei ka seng kaba la pynmih bun ki MLA hynrei kiba bun ki mih ynda kila jop, bad u la ong ba ha kine ki 50 snem tam ba ka HSPDP ka iaid lynti, ki don 40 ngut ki MLA kiba jop na ka HSPDP.

“Nga la peit ia ka kot sahkynmaw ka HSPDP, ki don 40 ngut eiei kiba jop MLA na ka party hynrei ha kaba kut, sah hi sa tang u ma ieid Hoping”, la ong u bah Pangngiang.
La ioh ruh ka jingkren na u MLA bah Methodius, kong Badariti, na u President ka HYC West Khasi Hills bah Lumlang Kharsyiemlieh.
Ha kajuh ka sngi, la leit buh syntiew ruh ka HSPDP Youth Wing ha mot jong u bah Hoping ha lum Mawthadraishan.
Ha kane ka samoi jinglong MLA ba mynta, ka HSPDP ka don 2 ngut ki MLA ba kynthup u bah Methodius Dkhar na Mawshynrut, bad u bah Shakliar Warjri na Mawthadraishan.