Palat 2729 sq km, kam ka Meghalaya ba iakajia bad ka Assam r1009 sq km tang ha Block-II, 537.54 sq km ha Block-I

Shillong, 29 Naitung: 
Ka Meghalaya ka la kam ba ki don haduh 12 tylli ki jaka ba la don hapdeng ka jingiaknieh bad ka Assam kiba la mih naduh ba la thmu ban pynkha ia ka, hynrei kine ki jaka ki dang don bun ha kti ka Assam.
Ka jingheh jong ka jaka ba ka Meghalaya ka la kam ba hap sha Meg halaya ka long haduh 2729.77 sq km ha kine ki khad ar tylli ki jaka ba iakajia.
Katkum ki kot ki sla ba la pyni da ka sorkar Meghalaya, kine ki jaka 12 tylli ba don hapdeng ka jingiaknieh bad ka Assam, kaba ka Meghalaya ka kam ba dei ha Meghalaya bad kine ki jaka ki long ka (i) Upper Tarabari, (ii) Gizang Reserve forest (iii) Hahim (iv) Langpih (v) borduar (vi) Boklapara (vii) Nongwah-Mawtamur (viii) Khanapara-Pilliangkata (ix) Deshdemoreah (x) Block-I &II (xi) Khanduli-Psiar bad ka (xii) Ratacherra.
Ka jingheh jong kine ki jaka ki long ka Tarabari-Nongriangsi-Nonglang 4.69 sq km, Gizang (Nongriansi-Nonglang) 13.53 sq km, Hahim (Nongsiangsi-Nonglang) 3.51 sq km kine ki hap ha
Rambrai Syiemship, ka Langpih 298.07 sq km ba hap ha Raid Mynsaw bad Rambrai Syiemship ha West Khasi Hills District.
Ha Ri-Bhoi ki jaka ba kam ka Meghalaya ki long ka Borduar 147.83 sq km ka Hima Nongkhlaw, Boklapara 1.57 sq km ha Nongspung Syiemship, Nongwah – Mawtamur 137.51 sq km ha Nongwah Syiemship, Khanapara-Pillangkata 2.29 sq km ha Mylliem Syiemship, Desh Doomreah 484.72 sq km ba hap ha Mylliem bad Khyrim Syiemship.
Ha Jaintia Hills ki jaka ki long ka Khanduli 12.80 sq km, Psiar 64 sq km  ba hap ha Raliang bad Nongjngi Dolloiship, Ratacherra 11.20 sq km ba hap ha Narpuh Eleka. Nangta ka Block-I ki jaka ba kam ka Meghalaya ki long 537.54 sq km ba hap ha Ri-Bhoi, bad ka Block-II kaba heh 1009.88 sq km ha Jaintia Hills.
Hynne ka sngi, ka sorkar ka la lum ia ka jingialang jong baroh ki seng sain pyrthei, bad ki nongialam na ki thain ba don ka jingiaknieh jaka ban iakren kham bniah halor kane ka kam hadien ba la dep pynlong teng kham mynshwa ruh.
Ha kane ka jingialang hynne ka sngi, la wan iashim bynta ki seng sain pyrthei ha kane ka jylla kum ka UDP, HSPDP, KHNAM, NPP, nalor ki myntri sorkar, ki MLA ruh.
Ka jingialang ka la thaw ruh ia ka kynhun jong ki seng sain pyrthei ban ia buddien ia kane ka kam bad ban shim ia ka rai kaba sngew biang ban leit sha ka iing Kashari ne ban shu iakren bad ka Assam ban pynbeit noh ia u pud u sam.
Shwa ia kane, u Principal Secretary ka tnad Revenue & Disaster Management u P. K. Srivastava u la pyni ia ki jaka 12 tylli kiba don hapdeng ka jingiakajia bad ka Assam bad ki nongrim ba ka Meghalaya ka la kam ia ki.
Ka jingialang ka long shi bynta ban wad shuh shuh ia ki sakhi satar ban pynkhlain shuh shuh ia ka jingkam ka Meghalaya ban ioh biang ia kine ki jaka na ka Assam.
Kane ka mat ka dei kawei kaba jwat bha ia ka sorkar jylla ban iapynbeit pud namar ba ka Assam ka la pyneh bad ka la mih ruh bun ki kynrum kynram ha ka liang ka shong suk shong sain kaba la pynlong ia ki briew wat ban kynriah jaka namar kane ka jingiakynad kaba la neh slem. Na ka liang ka sorkar Meghalaya ka kwah ba ia kane ka kam, dei ban pynbeit da ka lynti kaba ki paidbah ka jylla ki pdiang hun khlem kano kano ka jingshah khnium.
Kane ka jingiakren pynbeit pud ka sorkar ka la khie puk naduh u snem 2010 hadien ba la mih ka jingshah siat iap jong ki saw ngut ki briew ha Langpih ha ki pulit ka Assam. Ka sorkar ha kato ka por, ka la kop ba kan pyndep ia kane ka jingpynbeit pud tang hapoh 45 sngi hynrei haduh mynta la san snem khlem pat poi shaei shaei ruh.