Palat 200 ngut shi bnai, leit buh ei ka kali sorkar

Shillong, 09 Nailur:
Ki longkmie ba kha khun tang ha Ganesh Das hospital ha Lawmali ki don kumba 200 ngut eiei ha ka shi bnai kiba ioh ia ka skhim Janane Suraksha Yojana (JSY) ban leit buh ynda ki la kha na hospital.
Ia ki longkmie la leit buh ei da ka kali maruti kaba la pynkhreh ka sorkar shaduh ing jongki. Lada shu shim kyllum, ka jingdon jong ki longkmie ba la leit buh ei da kane ka kali jong ka sorkar ha ka shi snem ka la kot sha ka 3 hajar ngut eiei ha ka shi snem.
Ki don 8 tylli ki kali maruti ba iateh bad ka sorkar ban leit buh ia ki longkmie ba kha khun bad na kine, ki don 3 tylli kiba niah da ki kynthei.
Ka sorkar ka siew dor sha kine ki maruti T. 15 shi kilometre por leit buh bad ynda ki la wan phai, ka siew T. 14 shi kilometre.
Nalor ba kane ka sorkar ka la don ruh ka skhim ai pisa ia kiba kha khun ha ka dor T. 7 spah ia kiba dei na jaka nong kyndong bad T. 6 spah kiba dei na jaka sor.
Kat kum ka khubor ba la iakren bad ki bor ba dei peit jong ka Ganesh Das ha Lawmali, la iathuh ba ki longkmie kiban ioh ia kane ka skhim JSY jong ka sorkar pdeng, ki dei ban pyndep ia ki katto katne ki bynta kiba kynthup ban leit phah peit lai sien eiei ha ki jaka surmar sorkar ban ioh ia ka Anti Natal check-up, injekshon TT ar sien, ban pyndep ia ka jingdih ia u dawai folic ban dih 100 tylli haduh ban kha.
Ki dei ban thiah ha ki jaka thiah paidbah ne general ward bad kiba thiah ha ki jaka thiah kyrpang ne private ward kin nym ioh ia kane ka skhim.
“Kiba kha ha iing ruh kin ioh ia ka pisa lada ki pyndep ia kine ki jingbthah ba ka sorkar ka la buh”, la ong u heh ka Ganesh Das hospital, Lawmali.
Kiba lah ban ioh ia kane ka skhim, ki dei ban kha im ia I khunlung bad tang ar ngut khun ka sorkar ka ai bad kiba la kha palat ia ka ar ngut, kam ai pisa shuh ka sorkar.
Ia kane ka skhim kaba la pyntreikam naduh u snem 2012 na ka skhim National Rural Health Mission (NRHM), bad kito ki hospital bym dei sorkar ruh hynrei kiba ithuh ne pynrung kyrteng ka sorkar, ki don kane ka skhim ai pisa sha ki longkmie ba kha khun.