Palat 2 spah, shim bynta ki khynnah skul ban pynshngain ia ka sor

Shillong, 15 Jymmang:
Kumba 2 spah ngut ki khynnah skul jong ka nongbah kila wan ban iashim bynta ha ka prokram ban pynlong ia ka sor Shillong kaba shngain ha ka prokram ba la pynlong da ka tnad pulit ka East Khasi Hills mynta ka sngi Thohdieng ha Don Bosco.
Ha kane ka prokram, ki heh pulit ka district kynthup u SP Bah Mariahom Kharkrang, u SP (Crimes) Bah Vivek Syiem ki la ai ia ka jingkren bad ka jingbatai hakhmat ki khynnah skul shaphang ka jingdonkam ban pynlong ia ka sor Shillong kaba lait na ka jingma bad ban pynlong ia ka kum kawei na ki nongbah kaba shngain.
Ha kane ka prokram ki khynnah skul ka St Anthony, Laitumkrah Presbyterian bad ka Kiddies Corners ki la wan ban sngap bad ban shah shkor ia ka jingbatai ki heh pulit.
La batai kumno ia ki khynnah bad ki samla ba kin tip ia ki ain pyniaid kali,ia ki jingsniew na ki drok, na kiwei ki kam sniew na ki bor internet.
Ki heh pulit ki la batai ba u drok u dei u tynrai jong ki jingsniew ha kaba kiba pyndonkam ia u, kin kylla long ki mentuh, ki dakaid, bad kiwei ki kam sniew.