Pakhang surok ka HANM Jaintia

Jowai, 29 Naitung:
Ka Hynniewtrep Achik National Movement (HANM) Jaintia Hills ha ka kyrwoh bala phah da u General Secretary ma Domonmi S. Dkhar la iathuh ba ka prokram iakhih kaba la pynbeit da ka seng kan iaid beit iaid ryntih kumba la dep ban pynbna ha kine ki khyndiat sngi.
Na ka liang ka seng ka pynpaw ba ka jingiakhih ka long na ka bynta ban pynioh ia ka hok jong kito ki 7 ngut ki mynsiem kiba la khlad noh na ka jingshah ring ha ka bor ding elektrik, halor ka jingleh bym suid niew jong ka sorkar ban pynioh jingiarap sha kiba ha iing jong ki. U ma D.S. Dkhar ula ong ba ka mynsiem briew ka long kaba kham kor ban ia kata jingdap snem jong ka jingioh District.
Shuh shuh na ka liang ka seng ka khot bad kyntu ia baroh ban iasnoh kti lang hapoh kine ki kynta iakhih jong ka. Ka seng ka ong ba kino kino ki bym kyrshan ia kane ka kam iap kam im jong ka jaidbynriew ka pyni ba kim don ka jingieit bad ka jingiatip lem para jait bynriew. Kumta ka seng ka khot ia baroh ki nongshong shnong ka ri Lum Jaintia ka ri tip-briew tib-blei ba kin pynpaw ia ka jingsngewlem sha kiba ha iing jong kitei kiba la khlad noh da kaba iasnoh kti bad ka seng halor kane ka jingdawa pynioh bai lutksan na ka sorkar sha kiba ha iing jong ki. Kumjuh ruh ka seng ka pynpaw ba kane ka jingpakhang surok miet kan yn don jingktah ha kaba iadei bad ka jingrakhe ia ka jingioh District jong ka East Jaintia Hills namar ba ka jingpakhang kan long tang ha ka por mynmiet kata ha ka por 8:00baje mynmiet haduh 5:00baje mynstep ha ka 30 bad 31 tarik mynta u bnai.