Pakhang shnong khlem kut por ha Darjeeling, ba dawa Gorkhaland

Darjeeling,31 Naitung:
Tang shi sngi hadien ba ka sorkar UPA kaba la ialam da ka Congress ka la pynbna jylla thymmai ia ka Telangana, kaba pait na ka ka jylla Andhra Pra desh, mynta ka sngi, ka Gorkha Janmukti Morcha (GJM) mynta ka sngi ka la pynbna ia ka pakhang shnong kaba khlem kut por, ka ban sdang naduh ka 3tarik Nailar, ban pynbor ia ka sorkar ban pynurlong ia ki jingdawa jong ka na ka bynta ban ioh la ka jong ka jylla ka Gorkhaland .
“Lada ka jylla Telan gana ka lah ban don balei ym lah ia ka Gorkha land? Ngi dawa ba ka jingdawa ba la 107 snem jong ngi ban pynurlong” ong u General Secretary ka GJM general uba long ruh u nongiaktien u RoshanGiri haba kren sha ki nongthohkhubor mynta ka sngi.
Kumba 6 ngut ki dkhot jong ka GMJ ryngkat bad lai ngut ki MLA kin leit sha Delhi ban ia kren bad ki MP bapher bapher jong ki seng sain pyrthei bapher bapher ban ia kren ha lor ka jingdawa jylla Gorkhaland. Ki 6 ngut ki dkhot ka GMJ ki ban leit Delhi ki kynthup ia u Giri , Trilok Dewan (Darjeeling MLA), Harkabahadur Chetri (Kalimpong MLA), Rohit Sharma (Kurseong MLA), DK Pradhan bad Amar Rai.
“Ngin bteng ia ka jingiakhih bad ki jingdawa jong ngi haduh ba ka sorkar kan ai jylla la ka jong ia ka Gorkhaland. Ngi kloi ban leh kumno kumno ruh ban ioh la ka jong ka jylla” ong u Gs ka GMJ.
U Giri u la kynnoh ruh ia ka sorkar West Bengal namar ka jingpynbor ia u Gurung ban iehnoh kum u GTA CEO. Ka sorkar jylla kam ai lad ia ka GTA ban trei kam bha bad kam ju ai ruh ia u shabi jong ki tnad treikam bapher bapher ba kin bat kum ka kam pohing bad ka pla tyngka, bteng biang u giri.
Haba kren halor katei ka pakhang shnong ba la khot da ka GJM u la ong ba yn shah tang ia ki karkhana pynmih slasha ba kin treikam.Na katei ka pakhang shnong ba la khot da ka GJM, ki bor pyniaid District ki la pynrben ki bor pahara ha khmat ophis u Majistor, katba ar pyrton ki CRPF la pynbiang ha katei ka jaka ba thmu ban pynlong pakhang shnong, ong ka thymmei khubor ba la ioh lum.
Ha katei ka pakhang ki dukan , ki jaka pule, ki bank baroh kin khang lut.
Ha kajuh ka por ka Shiv Sena ruh ka la khot ia ka pakhang shnong ba ar sngi ha Siliguri, ka ban sdang naduh ka 1 tarik u Nailar kum ka jingpyrshah ia katei ka jingdawa Gorkhaland.