Pait phruk ka NPP ha KHADC

Bah RM Shabong

Sngewbieit shi katdei, halor ka jinglong jingman jong ka sain hima sima ha Khasi District Council bad kata ka long, haba ka seng, kaba ialam ia ka sorkar Jylla, ka pait noh phruk ha ka Council bad kata ka long ba lai ngut na ki MDC jong ka NPP, ki la leit ban ia treilang bad ka seng Congress ha ka Council.

Halor katei ka jingjia, ka dei hok ban kdew kti ia U bah PN Syiem, uba dei u lamphang ka dorbar KHADC, namar ba u dei ka daw, kaba pyn khyllem ia ka EC jong ka UDP; hynrei ha kajuh ka por, ka dei pat ban don lehse, ka jing eksamin bha, namar ba lada ka dei ka daw jong U Bah Syiem, ba u pynhap ia ka EC, kumta ka dei ruh ban don ka daw ia U bah Teinwell Dkhar, uba dei U CEM, ba na kano ka daw, um lah ban pynneh ia la ka jong ka EC bad ka wan ka phang, ba lada u ia don daw bad u lamphang dorbar, hynrei kumno un ia don daw bad ar ngut na ki Executive Member jongu, haba ki ia don lang ha kajuh ka kynhun bad ha ka jingshisha, ula dei ma u kein, ba un ialam bad btin lynti ia kitei ki EM, kiba dang shu jop bad kumta, ka long kaba sngew kyndit, ba un lah ban khring, da uba na jngai, ia uba don hajan eh.

Ngim tip, ia kaei ba ka NPP, ka pyrkhat na bynta kitei ki MDC, kiba la kyntiap seng noh bad lehse, ka lah ban pynshitom lane ka lah ban ai jing maham ia ki, hynrei kaba ki dei ban pyrkhat jylliew, ka long ba ka EC, kan nym khyllem satia, lada kam don ka daw bad lah ruh ban ong ba U Bah PN Syiem, um dei uba thymmai ha KHADC, hynrei, ula ia kynduh kam teng bad kiwei de ki nong ialam, ba kynthup ia U Bah HS Shylla, Bah Ardent Basaiawmoit, Bah Adelbert bad wat ia U CEM ba mynta ruh.
Ka jingshisha mynta ka long ba ka UDP ruh kan hap ban kynmaw ia kaei kaba ki la dep rai kham mynshwa bad kata ka long ba U bah Teinwell, un bat shisnem bad hadien kata, un wan U Bah Titos lane U Bah Paul bad haba U bah Tein, um lah ban pyndap snem ialade, kumta ki lah ban kynnoh ia u a, u b, u k; hynrei ha kajuh ka por, kin hap ban pyrkhat thymmai, ba ka la dei ka por, ba kin wad ia uwei pat u nongialam, lehse, uba kham skhem ka jingmut jing pyrkhat lane uba kham lah ban pyniajan bad ki paralok MDC.
Tang kawei kin hap kynmaw, ba ki lah ban ia milai bad U Bah Latiplang, hynrei ka jing ia milai bad ka Congress, kan pynjem rngiew ia ka UDP lane ia ka NPP ruh kumjuh.