Pait ka Mawdatbaki haduh lai konstitwensi, 15 tarik yn rai la yn thep ne em

Shillong,11 Rymphang:
U Rangbah shnong ka Mawlai Mawdatbaki u bah PR Kharmujai, ryng kat ka jingsynran lang ki seng Samla shnong ba kynthup ia u General Secratary u bah Kenny Mukhim bad u Organiser u bah Wanlam Kharpran, haba kren sha ki nongthohkhubor mynta ka sngi ha Shillong Press Club ki la pynpaw ia ka jingpyrshah jur halor ka jingphiah konstitwensi thymmai ka KHADC, namarba katei ka shnong kaba don haduh 8 tylli ki dong la pynpait ia ka haduh lai tylli ki konstitwensi. U rangbah shnong u la iathuh ba la phiah ia ka Mawdatbaki haduh lai tylli ki konstitwensi ka Mawlai konstitwensi, ka Jaiaw bad ka Mawkhar lane ka north Shillong. ‘ Ha ka jingshisha ki la dei ban phiah ia ka Phudmuri kaba don ha khmat, hynrei la phiah pynban ia ka Mawdatbaki’ ong u bah Kharmujai.
U Rangbah Shnong bad ki seng samla haba kren sha ki nongthohkhubor, ki la ong ba kham mynshuwa ki la ia kynduh ia u MLA ka Mawlai ha kaba ki la ong ba u la iathuh ha ki ba ki konstitwensi kin neh kumjuh kum ka MLA, bad haduh kine ki sngi ki paidbah ki dang pyrkhat ba ka Mawdatbaki kin dang hap hi hapoh Mawlai, hynrei kyndit kyndit shuwa ban sdang ka elekshon ka la mih ka jingpynbna ba katei ka shnong ka la pait haduh lai tylli ki konstitwensi. “Ym shym la don kiba ai jingtip sha ka shnong na ka liang ka KHADC” ong u Rangbah shnong Mawdatbaki.
Halor katei ka um dum kaba ki paidbah ki sah, namar ka jingphiah konstitwensi, ki seng samla Mawdatbaki ki la ong ba kin ialum ia ka jingialang paidbah ha ka 15 tarik mynta u bnai ha ka por 8:30 baje mynstep ha Nongmali I bad hatei ka jingialang ki paidbah kin shim ia ka rai la kin ia shim bynta ne-em ha kane ka elekshon MDc ka ban wan. “Baroh ka rai kan shong ha ki paidbah” ong uwei na ki nongialam seng Samla.Lah ban kdew ba ki la don haduh 1500 vote tam ki nong Mawdatbaki kiba la shah weng na Mawlai konstitwensi napdeng ki nongthep vote kiba la jan kot sha ka 6000 vote.