Pait ka ïit na khyrdop, sop ñiut ka hospital ka KHADC kaba T. 6 klur ha Lum Sohpetbneng

Shillong:Ka Khasi Traditional Medicine Institute (KTMI) ha Lum Sohpetbneng Ri- Bhoi kaba la tei da ka Khasi Hills Autonomous District Council (KHADC) na ka pisa ka Tribal Affairs ka sorkar India, kam pat la lah ban pyntreikam haduh mynta.

Ha ka jingiaid lynti ban peit ia katei ka jaka sumar Khasi, la iohi ba ka ïit na khyrdop ka la shah pynpait bad ka phyllaw ka dang sop niut na ka jingbym pat plie bad ban pyntreikam ia ka.
Ia kane ka hospital kynbat, la tei ha ka jinglut kaba T.5.77 klur bad ka kam ba kongsan ka long ban long ka jaka sumar bad hikai ia ka jingstad jong u Khasi ha ka rukom sumar ia kiba pang ba shitom.
Ha ka jingshisha, ka Khasi Hills Autonomous District Council (KHADC) ka la buh thong ban pyndep ia kane ka jingtei bad ban plie ha u snem 2020 hynrei haduh mynta khlem pat dep satia.

U CEM ba mynta ka KHADC u bah Pyniaid Sing Syiem ula pyntip kham mynshwa ba yn plie noh ia kane ka jaka sumar Khasi namar ba ka jingshna ka la jan dep lut baroh.
Ka KHADC ka la thaw ia ka Khasi Hills Autonomous District (Protection and Promotion of Khasi Traditional Medicine) Act, 2011 ban ithuh ia ki nongsumar Khasi katkum ka ain khnang ba kin lah ban sumar bad haduh mynta ki don kumba 1200 ngut ki nongsumar Khasi kiba la aplai ban ithuh ne ioh syrnod hynrei ki don 57 ngut kiba la sam syrnot doctor ne nongsumar ka KHADC.

Kum ka jingsdang ka Council, ka la buh thong ban pdiang shwa tang kumba 20 ngut ki nongpang bad hadien kane pat kin sa peit. Ha kane ka jaka sumar kan dei beit da ka jingsumar tynrai bad ki nongsumar lane ki doktor kidei kiba la tbit ha katei ka laiñ ai dawai bad sumar tynrai.
Ka Council ka la thaw ruh ia ka Khasi Traditional Medicine Commission (KTMC) na bynta kane ka jingthmu.
U CEM ka KHADC ula pyntip ba ka Council kala ai ban pyniaid ha ka Center of Learning, Knowledge and Services (COLKS) ia kane ka jaka sumar.

Watla ki nongsumar Khasi kila khmih lynti ban pyntreikam noh ia katei ka jaka sumar hynrei imat ka lah ban kham shimpor namar ba ka dang donkam ban pynbiang ia ka bording, ia ka um bad kiwei ki jingdonkam.