Paiñ nong ka lok T.60 hajar tyngka ban pyniap ia u lok, lap ki pulit sa tang ki shynrong khlieh bad ki shyieng

Shillong: Ka dei ka jingjia kaba kham pher kaba la jia ha ri Lum Garo ha kaba ka lok ka la pain nong ha ki riew thrang snam ban pyniap ia u lok jong ka bad ka dor ba ka paiñ nong ka long T.60 hajar tyngka. Katei ka jingjia ka dei kaba la jia ha ka shnong Rensigre kaba hap hapoh Damal Asim Out Post, katei ka jingjia ka dei kaba la jia slem naduh u bnai nailur jong u 2018.
Ha katei ka jingjia, ki pulit ki la iathuh ba uwei u briew uba la tip kyrteng kum u Gileng B Marak u la jah rngai na la ing naduh ka 29 tarik u nailur, 2018 hynrei ym shym la don satia ba pyntip pulit ia katei ka kam, khadduh u hynmen jong u hadien ba u la ioh jingtip na ki para shnong ba kim shym la iohi ia u, u la leit ban ujor pulit bad ki pulit ki la sdang ban wad.
Hadien ba la sdang ban tohkit ia katei ka kam, ki pulit ki la lap ba ka mobile phone jong u Gileng ka dang treikam bad ka dang pah haba phone, nangta ki la lap ba ia ka thuk thuk jong utei u briew la pyndonkam da u pyrsa kurim jong u -u Ome B Marak. Suki pa suki ki pulit ki la sdang ban tih bniah lyngba ka jingujor ba la ujor da u hynmen jong u ha ka 18 tarik u risaw, 2018.
Ha sdang jong ka jingtohkit ki pulit ki la sdang na ing jong u ban kylli bniah hynrei ka lok bad ki khun ki ong ba kim tip eiei, ki pulit ki la shim kes ia katei ka jingjia ha ka 12 tarik u kyllalyngkot mynta u snem bad ki la thung ia u ophisar ban tohkit ia katei ka kes. Dei tang hadien katto katne sngi ba ki la lap ia ka metiap jong utei u briew kaba sah sa tang ki shynrong khlieh bad ki shyieng.
Haba tohkit bniah ia katei ka jingjia, ki pulit ki la lap ba la pyniap ia utei u briew da ki riew thrang snam kiba la pain nongda ka lok jong u hi ka Nojeni B Marak ha ka jingsiew kaba T.60 hajar tyngka bad ki la lap ksai ruh ba ka daw jong ka jingphah pyniap ia u ka dei namarba u la leit beiñ ban shoh ban dat ia la ka lok manla ka sngi.
Na ka jaka ba la lap ia ka metiap ki pulit ki la lap ia ka mobile kaba la pait, ki slipar na surok bah jong ka Gabil Road kaba don ha Anogre kaba hap hapoh ka Jengjal PS. Ha ka jingtohkit la lap ruh ba ka lok jong u ka la ia sylla bad u khunjong ka u Theman B Marak bad u pyrsa kurim u Ome B Marak ban pyniap bad bret ia ka met jong u.
Da ka jingioh kem ia kitei ki pulit ki la ioh kem ruh ia ki 3 ngut ki briew kiba la shim nong ba trei ia katei ka kam , kitei ki briew ki dei kiba la tip kyrteng kum u Lesbath D Sangma, Pinal D Sangma bad Raseng B Marak, kiba la phla ba ki la pyniap ia u.