Pahara skhem bha ka Israel, ioh shah hiar thma kyndit ha ka Iran

Tel Aviv:Ka Israel, ka la khang noh ia ka GPS jongka bad ka la khang ia ki shipai jongka, ba kin leit shuti bad pynkhlain ia ka jingpahara ha suin, namar ba ka tieng, ia ka jinghiar thma ka Iran, kaba lah ban jia ha kano kano ka por, hadien ka jingiap jong ki 13ngut ki briew, ba kynthup ia ar ngut ki heh shipai jong ka Iran, ha ka jingther bom jong ka Israel ha Syria.

Ka Israel, ka khmih lynti, ba ka Iran, ka lah ban hiar thma ia katei ka Ri, hadien ka 5tarik Iaiong, kaba dei ka sngi thohdieng kaba khadduh jong u bnai ba khuid jong ka Ramadan bad la shim ia katei ka sngi, ba ka dei ka Jerusalem Day, ha kaba ka Israel, ka kyrshan tylli ia ki jaitbynriew Palestine.

Ka jinghiar thma jong ka Israel, ia ka jaka treikam jong ki shipai Iran, ha ka nongbah Syria, ka la pyniap ia u heh duh ka Iranian Quds Force, U General Mohammad Reza Zahedi bad kane ka dei ka jingpyniap kaba jubor tam, hadien ka jingshah pyniap jong U Major General Qassem Soleimani, uba la shah pyniap, ha ka jinghiar thma da u drona ha u snem 2020.

Haduh mynta ka Iran, kam ju hiar thma beit dalade pyrshah ia ka Israel, hynrei la shim ba ha kane ka kynti, kan lah ban pynhiar kput ia ka Israel bad kaba lah ban pynshongsyier ia ka thain Middle East baroh kawei.