Ong u Myntri ba angnud ka sorkar ban kyntiew ia ka rep Sohtrun ha Ri Bhoi

Nongpoh: Ka 2nd Pineapple Festival ne ka Tamasa ban pyni nam ia u Sohtrun, kaba la pynlong da ka Ri-Bhoi Tourism & Environmental Forum (RBTEDF) ha Madan Pahamsyiem Nongpoh, ka la khring shisha ia kiba bun ki paidbah bad ha katei ka Tamasa la iohi ba bun ki paidbah ki la leit ban sakhi ia katei ka Tamasa kaba la pynlong da ka RBTEDF.

Ha katei ka Tamasa ba shisngi jong ka RBTEDF, la sakhi ruh da ka jingdon u Bah Banteidor Lyngdoh Myntri ka tnad ka rep ka riang ka jylla, u Bah Jason Mawlong MLA ka Umsning, Bah Mayralborn Syiem MLA ka Nongpoh, ki heh ophisar na ki tnad sorkar lem bad kiwei.
Lyngba jong katei ka Tamasa, ki paidbah na kylleng ki dong bad ki thain ki la wan ban sakhi ha katei ka sngi ia katei ka Iew pyn-i-nam ia ki sohtrun kiba mih na Ri Bhoi, na ka bynta ban iohi bad mad ia kitei ki sohtrun kaba la pynmih da ki nongrep na ki shnong bapher bapher ha Ri-Bhoi.
Haba kren ha katei ka sngi, u Bah Banteidor Lyngdoh Myntri, u la ai ka jingiaroh ia ki nongialam ka RBTEDF bad khamtam eh ia u Bah Pliellad Tiewsoh, u Chairman jong katei ka kynhun, namar ka jingshimkhia ka jongki ban pynlong biang ia katei ka Tamasa Sohtrun, kaba long ruh kum kawei na ki lad ban iarap ha ka ban kyntiew bad pynshlur ia ki nongrep Sohtrun ha Ri Bhoi.
Shuh shuh, u la ong ruh ba ka Ri-Bhoi, ka dei kawei na ki jaka ba pawnam ha kaba pynmih ia ki jaitson bapher bapher kata nalor u Sohtrun bad dei na kata ka daw kaba la pynlong ruh ia ka sorkar ba kan phaikhmat kyrpang sha Ri Bhoi, da kaba thmu syndon ban wanrah syndon da kawei ka Food Processing Unit, kaba long ruh kum ka jingailad ia ki nongrep ban sengkam sengjam, namar lyngba jong katei ka Food Processing Unit, ki nongrep kin lah ban pynmih ia ki jait jingdih na u Sohtrun lem bad na kiwei pat ki jait soh.
Ha katei ka sngi, la ioh ruh ia ka jingkren na u Bah Jason Mawlong Sawkmie bad u Bah Mayralborn Syiem, kiba la pynpaw lem ia ka jingkmen ban don kum kane ka Tamasa pyninam ia u Sohtrun, kaba long ruh kum kawei na ki lad ban nangkyntiew ia ka kam rep Sohtrun ha ki shnong bapher bapher ha Ri Bhoi.