Shillong, 17 Naiwieng:
U MDC ka KHNAM na Jaiaw, Bah Adelbert Nongrum u la ong lada ka jingthmu ban iada ia ka Jaidbynriew ka pulom, un long u briew banyngkong ban kieng atiar ban iada ia ka Jaidbynriew.
“Lada ka jingthmu ban iada ia ka Jaidbynriew ka pulom, ngan long u briew banyngkong ban kieng atiar ban long ruh kum u ‘ Kaisor’ ym kum u ‘ Kaikhlaw’ ban ialeh na khlaw hynrei ban ialeh beit hapoh sor”, la ong u Bah Adelbert u la byrthen tyngeh haba kren ha ka jingialang jong ka KHNAM halor ka Inner Line Permit (ILP) ha kane ka sngi Saitjain ha Mawlai.
U Bah Adelbert u la ong ka jingïai mynthi bad leh bym patiaw jong ka sorkar ia ka jingdawa jong ki sengbhalang ban pyntreikam noh mardor ia ka ILP hapoh ka jylla, ka la pynlong ia kiba bun ki samla kiba la pynpaw ba kin long kiba kloi ban kieng atiar lada ka sorkar kam pynurlong ia ka jingdawa.
U la kyntu ia ki samla ba kim dei ban shu shim rai kyrkieh hynrei ban ai lad shwa lyngba ka bor synshar bad lada kam urlong, ngan long ma nga uba nyngkong eh ban shim ia kane ka lynti ban kieng atiar na ka bynta ban ialeh ban iada ia ka jaidbynriew. U Bah Nongrum u la ong ba u Myntri Rangbah ka jylla, u Mukul Sangma, u ong ba ka aiñ ILP ka dei kaba la iap hynrei kane kam long satia kumta.
Hynrei namar ba kim don ka mon bad ba kata ka jingiatip lem ha ki ka la iap noh, kaba la pynlong pat ia ki samla ba kin mih sha madan ban ialeh na ka bynta ka hok ka jong ka jaidbynriew.
Ha ki por jong ka jingialam lynti jong U Jisu Khrist don uwei u Judas. Hynrei ha kane ka sorkar u Mukul, ki don haduh 11 ngut ki Judas kiba dei ki Myntri kibym don shuh ia ka jingiatip lem hynrei ban long kiba kloi ban pynngat ha ka aiñ MPDA ia ki samla kiba iakhih na ka bynta ka hok. Hato kaei pat ba kin leh ynda ki lait patok hadien lai snem ka jingshah set bad shaei ka lawei ka jong ki”.
Ha jaka ka ILP ba dawa ki paidbah, ka sorkar pat ka la wanrah pynban da ka OLP ne ka Outer Line Permit, kata ha kaba ka la kyndang bad beh naphang ia ki trai jylla kumba ka la jia ha ka shnong Umsawli bad Mawtari,” la ong u Bah Nongrum.
U MDC ka KHNAM na Mawkhar, u Bah James Ban Basaiawmoit, haba ai jingkren u la ong ba u dap da ka jingsngewkhia ban iohi ba ki paidbah haba don ki lympung iatem iaput ne ki jingialehkai phutbol, naduh shwa ban sdang ki la pyndap ia ki jaka hynrei haba poi pat sha ka kam kaba iadei bad ka iap ka im jong ka Jaidbynriew bun kiba shu iakhñium tang ha ïing hynrei kim nud pat ban mih paidbah bad pynpaw na ka bynta ban ioh ia la ka jong ka hok hynrei ban ia ai daw da kumne kumtai.
U Bah Basaiawmoit u la ong ba ki thlen ki don hapoh Secretariat’ kiba ap ban bam para Khasi bad kane ka paw shai namar la ju iakren ba u thlen um ju bam ia ki bar jylla namar ba u sngewjem daw. Kumta kine ki thlen Khasi ruh kim nud ban bam ia ki bar jylla namar ki tieng ioh ki rem noh ha ka ilekshon.
U Bah Basaiawmoit u la ong, ka jingong ba ka ILP kan ktah ia ka roi ka par, ka long kabym iahap satia namar haba pang ba shitom donkam ban ioh ia ka jingsumar ym ban thied ia ki jaiñ ki nep.
Kumta kum ka Jylla ruh mynta ka don hapdeng ka jingpang, kumta donkam ban pynkoit ia ka ym ban kwah ia ka roi ka par namar haba koit ba khiah ka roi ka par ruh kan wan.
La ioh ruh ia ka jingkren na u President ka KHNAM u Bah Pyndapborthiaw Saibon, na ki nongkitkam ka KHNAM, kumjuh ruh na ki nongialam jong ka Mawlai Peoples Development Forum ( MPDF) kiba la ai ka jingkyrshan pura ia ka KHNAM bad ki Sengbhalang, kiba ieng ban dawa pyntreikam noh ia ka Inner Line Permit ( ILP) kaban teh pyrkhing ia ka jingwan rung kyrthep ki bar jylla bad ki mynder Ri hapoh ka Jylla, u MDC ka Nongthymmai, u Bah Latiplang Kharkongor, nalor kiwei kiwei pat.
Phi don ban ong eiei?