Ong ka mei ieid, ba kam tieng satia ia ka jingpang corona

Shillong: Hadien shibnai tam kynthih, ba la khang ia ka Iewduh, ha ka 18 tarik u bnai Jylliew 2021 la iohi ia ka jingsdang plie biang jong ki dukan ba pher ba pher ha Iewduh katkum ki sngi ba la pynbeit na ka bynta jong ki.

Na ka liang ka ophis jong ka Deputy Commissioner ka East Khasi Hills ka la pynmih ia ka hukum ba baroh ki nongshong die jingdie, ki dei ban ai shwa ia ka tika khnang ban ioh ban plie ia ki dukan jong ki ha kaba ki la don ki nongshong dukan kiba la leit ban ai ia ka tika hynrei ki don ruh pat ki ba la kyntait ban ai ia kane ka dawai tika.

Halor katei ka bynta ba la mih ha ka hukum ba ki nongshong die jingdie ki dei ban ai ia ka tika, ha shwa ba kin plie bad sdang biang ia ka jingdie jingthied jong ki, kawei ka nongshong die jingdie ha Iew kaba ju im jakpoh, da kane ka kam ban bsa ban btiah ha iing hasem ka la kyntait mardor ban leit ai ia ka dawai tika ha kaba ka la ong yn leit ai injek leh au haba tang pang ruh khlem pang bad katei ka longkmie hi ka la ong ba lada don mano mano ba beh ia ka ruh tang namar ba ka khlem ai ia ka injek kam don jingpher da kaba ka la ong ba ka Corona hi kam don shisha hynrei dei Blei hi u ba la phah ia kane khlam bad ka la ong kiba dei ban ioh ki ioh bad kiba dei ban lait ki lait.

Ka la ong, ba na ka liang jong ka hi, kam don jingsheptieng satia ia kane ka khlam namar ka ngeit skhem ba kam dei ka jingpang kaba wan na ka pyrthei hynrei kadei ka khlam kaba la phah hi da u Blei namar u Blei u la ong ba un theh ia ka khlam namar ka jingpynsohsat bad pynsngewsih eh ka jong u khun bynriew. Kane ka longkmie ka la ong ruh ba kane ka jingong ba don u Corona ka dei tang ka jingthok suda, namar kum kata hi kam don hi re bad lada ban iap hi hap iap beit.

Haba kylli ia katei ka longkmie la ka ioh pdiang eiei ki marbam kiba la sam ei, katei ka longkmie ka la ong ba ka khlem shym la ioh eiei ruh em hynrei ka la shu ioh pdiang tang na ki sengbhalang kiba la wan ban sam ha Motphran ha ki sngi kiba la dep bad na ka liang ki nongmihkhmat lei ka la iathuh ba ki khlem shym la ai eiei ruh em haduh kine ki sngi.