Ong ka lok “U lok u la iap ha u snem 2016, hynrei u dang im ha ka MNREGA”

Nongpoh: Ki katto katne ngut ki rangbah lem bad ki Longkmie na ka shnong Tyrso Pdeng ha Ri Bhoi, ki la kynnoh ba ka rukom pyntreikam ia ka skim MNREGA ha katei ka shnong ka long kaba thurmur bad khlem da pyntreihok. Ia katei ka kam bamsap la lap lyngba ka RTI jong u Bah Lespher Mawlong, uba dei ruh u riew rangbah jong katei ka shnong.

Haba iakren bad ki nongthohkhubor mynta ka sngi ha Bhoirymbong, kitei ki rangbah bad ki longkmie, ki la iathuh ba ia katei ka kam la leh donbor da u Rangbah shnong, uba dei u Chairman ka VEC ha katei ka shnong, ha kaba ki la iathuh ba ka rukom pyntrei ia ka skim MNGRGA ka la long kaba thurmur shaba palat, namar lyngba katei ka RTI la lap ba ki la don ki nongbat ia ka Job Card kiba khlem trei, hynrei ia ka pisa pat la leit ban sei da u Chairman ka VEC.
Lyngba katei ka RTI, la lap ba kawei na kiba la shah ktah eh ka dei ia kawei ka Longkmie ba la khlad noh u Lok naduh u snem 2016, ha kaba la pynim beit ia katei ka kyrteng jong utei u Lok, da kaba pyni ba u trei beit bad utei u Chairman ka VEC, u leit beit ban sei ia ka pisa.
Katei ka Longkmie kaba la tip kyrteng kum ka Kong Meristila Masharing, ka la iathuh ba naduh ba la khlad u lok jong ka, kam shym la ioh ban bat ia ka Job Card ne leit trei bad yn nai iakren shuh haba iadei bad ka jingioh pisa, ha kaba ka la pynpaw ia ka jingsngewsih kaba jur halor katei ka jingshah banbein ia ka bad katno tam ba ka dei ka briew kaba duna ha ka ioh ka kot.
Ki la don kiwei ruh, kiba la iathuh ba ka jinglehdonbor da utei u Chairman ka VEC ka la long shaba palat put, namar ka la don ka khep kaba katei ka shnong ka la ioh ban pyntrei ka kawei ka surok iaid kali ha katei ka shnong, hynrei haba iadei bad katei ka jingpyntrei ia katei ka surok, ki la don haduh 45 ngut ki nongbat Job card kiba la shah kyntait bad khlem ioh trei.
Haba iadei bad katei ka kam pyntrei thurmur da utei u Chairman jong katei ka VEC, kitei ki rangbah bad longkmie, ki la kyntu ia ki bor ba halor ba kin shimkhia bad ban leh ei ei halor katei kaba la jia ha katei ka shnong, khnang ba kan da long ka jingmyntoi ia ki paidbah ba bun balang.