Ong Bah Bindo “Ka pung Umiam kan sa dei ka Marten ba ar”

Shillong, 22 Nailur:
Lada ka sorkar kam kyndit bynriew noh ban pynkhuid ia ki jaboh jabain kaba lang bad iai tuid sha ka pung Umiam, khlem slem shuh kane ka pung pynmih ding ka MeECL kan sa kylla long ka marten baar, la ong u Senior Working President ka UDP u Bah Bindo Mathew Lanong haba iakren mynta ka sngi sha ki lad pathai khubor.
U Bah Bindo u la ong ba ka pung Umiam ka la shlei ki jaboh jabain kaba jubor bha bad ym slem shuh ba kan sa kylla ka jaka pynlang niut kaba kum ka marten.
U la ong ba ka jingpymih ding ka sorkar na katei ka pung ruh kan sa ktah lada kam kyndit bynriew ban shim khia ban pynkhuid noh ia kane ka pung.
“Peit tang mynta, ka jingpynlip ka la jur bha bad kan nang jur lada ka sorkar kam lah ban tehlakam noh”, u la ong.
Dang ha kane ka dorbar ba dang shu dep, ka sorkar ka la ong ba kan ai ding lut ia baroh ki shnong ha ka jylla hynrei mynta ngi la iakynduh jingeh ha kaba ka jingpynlip ding ka la sdang ha baroh kawei ka jylla, u la ong.
U la ong ka jingthmu ka sorkar ban pynkhuid ia ki wah ha Shillong kan nym long kaba jop lada kam leh da kiwei ki lynti ban sdang shwa naduh tyllong ba wan ki jaboh.
Ka jingpynkhuid ia ki wah, kam dei ban pynkhuid ha wah hynrei dei ban pynkhuid naduh ki tyllong, ha kaba la iohi ba ym tang ka sorkar hynrei wat ka KHADC ruh ka la pynkhuid hynrei kam pat poi shaei shaei ruh.
Ki um ki wah ha kylleng ki jaka sor, ki pahuh hynrei ka donkam ba ka sorkar kan shim ia ki lad ki lynti ba biang namar ba tang mynta ruh ka um ka la shu lait ei sha madan madiah.
“Ki tyllong um ki bun ha kylleng sawdong ka sor, ka sorkar ka lah ban pyndonkam ha kaba kan nym don ka jingkyrduh ha ka sor”, la bynrap u Bah Bindo.