‘Oh! Tang na ngi shi kten jasong, lar ling shaba iohnong’

Shillong, 8 Jymmang:
U Janis Khong sdir u dei u lahduh ha ka jingiakob Meghalaya Superstar 2016 kaba dei ka rynsan ia pyni sap ha kane ka jylla kaba la wan ban ia shim bynta da kiba bunbah ki samla kynthei bad shynrang na kylleng kane ka jylla Meghalaya. Ia katei ka rynsan la pynlong da ka All Megha laya Dancer Association bad ka phainal ka la long ha ka miet sngi saitjaiñ jong ka taiew ha State Central Library.
U Janis Khongsdir u dei na ka shnong Pyrnai ka shnong kaba don sharum Pynursla. Utei u simpah simsong ba dang kham khynnah ka thaiñ Ri-War mihngi u la ioh ia ka khusnam da ka song pisa kaba T.1 lak. U dei u ba dang shu paw pyrthei dang shen ha katei ka thaiñ hadien ka jingiashim bynta jong u ha katei ka rynsan. Ki la don 11 ngut ki riew donsap kiba la poi sha ka phainal kaba la long ha ka miet sngi saitjaiñ hynrei ia ka nam lahduh la rah da utei u kaitor ka thaiñ Ri-War katba ia ka nam kaba –ar pat la rah da ka Pinky Sunn na ka shnong Mairang. U Janis u la jop ia katei ka rynsan naduh ka jingpeit ki nongbishar haduh ka jingioh vote jong u na ki paidbah kiba sngewtynnad ia ka sur jong u. Haba phai sha ka jingioh vote u la ioh haduh 18 hajar tam.
Lah ban kdew ba ha kine ki khyndiat sngi baroh ki riew donsap kiba la poi sha ka phainal ki la pan jingkyrshan na ki paidbah ban vote ia ki ba kin long ki lahduh ha ka jingiakob bad ia katei la iohi ba la phah lyngba ki kotkhubor , ki Social Media (Facebook, Whattapp bad kiwei ki lad jing pyntip), kumjuh ruh la iohi ba la pan jingkyrshan ia u Janis da kiba bun ki paralok jong u lyngba ka Facebook kaba la ju buh jingthoh na ka por sha ka por ha ka Page Group ‘War-Pynursla’.
U Janis u la kylla long u kaitor ba paw bha ha kine ki sngi ha ka thaiñ Ri-War Mihngi dei na ka daw ka jinglah jong u ban khring ia ki paidbah ka ri-war ba kin sngewtynnad ia ka sur jingrwai jong u naba bun ki jingrwai kiba u la rwai ki dei kiba u la rwai ha ka ktien shnong lajong lane ha ka ktien Mawja kaba la lah ruh ban ktiak ia ka mynsiem ki briew haduh ba ki la ai ka jingkyrshan ba radbah ia u ha katei ka jingiakob ban long u khlur ba tyngshaiñ ka jylla Meghalaya lane Meghalaya Superstar.
Katto katne na kui jingrwai ba utei u nongrwai u la rwai ha ka ktien shnong la jong ka dei ka jingrwai ‘Haribo-Haribo’ bad kawei pat kaba kham pynsngewbang na ki jingrwai jong u ka dei kaba u la rwai shaphang ka jingshoh jingieid bad kawei ka samla haduh ba la poi sa u pud ban ia pynbeit sngi noh ban ia kyntiew ia thoh shongkurim bad ka jingioh ksai ban ia kynduh ia katei ka thei samla ka dei lyngba u shi kyntien kwai kaba u la pynkut ia ka jingrwai kaba u la ong ‘Oh ! Tang na ngi shi kten jasong lar ling shaba ioh nong, Oh ! tang na ngi shi kten jasong lar-ling shaba ia shong’ kaba mut oh tang na i shi kyntien kwai poi shisha sha ka jingioh nong bad sha ka iashong.