Nyngkong, ki ong ia ka roster, mynta ki wan rah ia kawei ka mat, ong u MR

Shillong:U myntri rangbah ka jylla u Conrad K Sangma, u la kynthah ia ka Voice of the People Party (VPP), kaba la mih noh na ka jingialang ban leit kren sha u paidbah wat hapdeng ba ka sorkar ka la kitkhia ban pynshai halor ka mat Roster system.

Haba kren mynta ka sngi hadien ba la wai ka jingialang jong baroh ki seng sain pyrthei, u Conrad u la ong, “Ngam sngew thuh naei ka nongrim ka VPP ka wan. Nyngkong ki ong ban iakren ia kane ka mat (Roster) bad mynta haba la pynshai ki la wanrah sa kawei ka mat”, la ong u Con rad.
Halor ka jing mih jyndat jong ki nongialam ka VPP na ka jingialang, u Con rad u la ong ba ka dei ka rai jong ki, hynrei kum ki nongialam ba don ka jingkitkhlieh ki dei sngewthuh kumno ban leh. “Ka dei ka rai jongki, nga kyntu ia ki ban sngewthuh bad kum ki nongialam ba don jingkitkhlieh ngi dei ban kitkhlieh ia ka jylla”, la ong u Conrad.

U la bynrap, “Ngi dei ban sngewthuh ba ki don ki bynta, ki phang ba lah ban pynthut ia ka jingsngew phet jaitbynriew bad kan ktah ia ka jingialong kawei ka jylla. Kum ki nongialam ba don ka jingkitkhlieh ngi dei ban tip, lano, haei, bad kumno ngi dei ban iaid shakhmat”.

Haba kynthoh ba kane kam dei ban long ka kabu politik, u Conrad u la ong ba kam long kaba dei ban pynlong politik ia kane ka mat. “Baroh kiei kiei kim dei na bynta ka politik bad ban ioh nong sain pyrthei, kum ki nongialam ba kitkhlieh dei ban pynthikna ban wanrah ia ka jingshngain, ka jingiada ia ki paidbah bad ka jingialang kawei”, u la ong u myntri rangbah.
“Nga kyrpad ia ki nongkyrshan jong baroh ki seng sain pyrthei ba ngi la ia im iashong lang da ki spah snem bad kum ka jylla ngi donbok ban ioh ia ka bhah thungkam kaba la pynioh kabu ia ki kum ki trai shnong”, la ong shuh shuh u Conrad.