Nohsynniang pluh iing ha Erpakon

Nongpoh, 09 Rymphang:
Kum shi bynta ban kner lem ka jingiarap sha ka longiing jong ka Kong Markordor Lyngkhoi bad u Bah Justarwell Marbaniang kiba na ka shnong Erpakon, Ri Bhoi District, kumta hynnin ka sngi ka HNYF, Northern Region, ka la leit ban nohsynniang da ki tin soping bad u khaw, sha katei ka longiing kaba la ngat ha ka apot pluh iing.
Ha katei ka sngi kaba ka seng ka la pynlong ia ka jingnoh-synning, la ialam da u Bah Marcus Marten, President ka HNYF, NR, ha ryngkat ka jingiasynranlang bad ki nongkitkam ka seng naduh ha ki Unit bad Circle bapher bapher. Kumta hadien ba ka seng ka la leit ban nohsynniang sha katei ka longiing, ka HNYF, NR, ka la kyntu ia ka ophis u BDO ba kan ai kham kloi ka jingiarap sha katei ka longiing bad ha kajuh ruh ka por ka seng ka kyntu ia ki Nongmihkhmat, kum ia uu MLA bad MDC jong ka Umsning Constituency ba kin kyrshan lem ia kane ka longiing kaba la ngat ia katei ka apot sngewsih.