Noh synniang ka JHDS 3 lak sha ka CM’s relief fund

Jowai: Ha kaba iadei bad ka jingialeh pyrshah ia u khniang jingpang Corona ka Jaintia Development Society (JHDS) ha ryng kat ka Jowai Diocese ki la noh synniang 3 lak sha ka Chief Minister’s Relief Fund ha ka sngi nyngkong.

U Bishop ka Jowai Diocese u Most Rev. Victor Lyngdoh u la aiti ia ka cheque sha u Myntri Rangbah ka Jylla u Conrad Sangma ha ophis trei kam jong u ha Secretariat.
Ha ka juh ka por u Bishop u la kular ruh ban aiti sha ka sorkar haduh 18 tylli ki school bad hostels jong ka Jowai Diocese kiba don ha Jaintia Hills na ka bynta ban pynlong ia ki kum ki Isolation Ward.
U Bishop u la ong ruh ba ka Jowai Diocese kan sa wan aiti ia ki 10 hajar tylli ki jingtap ktien-khmut na ka bynta ban ioh sam sha kiba donkam ban iada na u Khniang jingpang Corona Covid 19. Kine ki jain tap tien-khmut (Mask) kidei kiba la shna hi da ki sister jong ki convent bapher bapher ka rilum Jaintia.
Ha kajuh ka por u Bishop u la ai khubor ia baroh ki paid riewngeit khristan bad kin duwai jar jar na ka bynta ban jop ia une u khniang jingpang bad da kaba kohnguh ia baroh ki jingbthah ka sorkar.