Noh synniang ka FKJGP ia ka skul May Queeen

Shillong,03 Jylliew:
Ka seng FKJGP Mawlai Circle ryngkat bad u Working President FKJGP Central Body u Bah Welbirth Rani mynta ka nohphai sngi ki la leit ban noh jingiarap ia ka skul May Queen School kaba don ha Mawlai Nong pdeng da ka song pisa kaba 1,50,000 (Shilak Sanphew Hajar tyngka).
Ka seng ka la shimkhia ia kane ka kam hadien ba ka la ioh ia ka jingud jingnam jong ki nongpyniaid skul na ka bynta ka jingduna jong kiba bun ki jingdonkam jong kane ka skul. Dei ha kane ka bynta ka seng ka la iaid shakhmat ban shimkhia ban pyndep ia ka jingkular ban pynioh ia kane ka song pisa kaba 1,50,000 (Shilak Sanphew Hajar tyngka) na kawei ka company jong ka Campa Mineral Water.
Ha katei ka sngi la don ka jingialang ha kaba la iadon ryngkat lang naduh u President ka FKJGP Mawlai Circle u Bah Marbud Dkhar ryngkat ki dkhot ka Mawlai Circle, u trai ka Campa Mineral Water u Beriwal S. N, u Rangbah Shnong ka Kyntonmassar u Bah Marco Metri bad ki bor pyniaid bad ki trai jong kane ka skul kynthup I Principal i Kong S. Nongkhlaw bad I Pastor L. Pohsngap.Na ka liang ki nongpyniaid skul naduh I Principal i Kong S. Nongkhlaw bad I Pastor L. Pohsngap ki la pynpaw ka jingsngewnguh ia ka seng FKJGP Mawlai bad central body ki ba la noh synniang ia kane ka song jingiarap. Kine ki nongialam jong ka skul ki la pynpaw shisha ka jingsngewnguh kaba khraw ia ki nongialam jong kane ka seng bad ia u trai ka company jong ka Campa Mineral Water bad kitbok ia ki ba kin don ka met kaba koit kaba khiah bad nang lah ban leh ia ki kam babha ia ka imlang sahlang jong ka Jaitbynriew Khasi.