Shillong: Ka Balang Presbyterian Iooksi kaba don ha West Jaintia Hills ha ryngkat bad ka Jingiaseng Kynthei, Jingiaseng Samla balang bad ka Kynhun ‘Chirup ha U Khrist’ (ka Kynhun ki khun ka shnong Iooksi kiba shong ba sah ha Shillong) mynta ka sngi kala synniang da u Khaw sha ki 181 tylli ki long iing kiba mad ia ka jingkyrduh na ka daw ka jingkhangdam (lockdown) jong ka sorkar. Ha shwa ban sam ia u khaw la ioh ia ka jingiaseng duwai ba kyrpang bad la ioh ia ka jingkren lyngkot (greetings) na ki nongialam kitei ki kynhun ba iatrei lang bad ka balang.
La ioh ruh ia ka jingiasyllok na U Pro. Pastor Emlangmi Sapuh (Adviser ka Kynhun ‘ Chirup ha U Khrist’) bad ka jingpynkyntang ia u khaw. U Pastor ula ai mynsiem bad kyrkhu kyrdoh ia ka Balang da ki ktien na ka Bible kiba ong “ uta uba isynei ia uba duk u ai kylliang ha U Trai, bad ia ka kam ba bha jong u un sa siew pat ia u’ ki Proberb 19:17.
Ha kane ka jingsam khaw ka Balang ka la mana pyrshah bym bit ban shondur ne ring video ia kito kiba wan shim khaw.
Ka burom ngin ai Sha U Blei ba ka Balang ka la leh katkum ki jinghikai jong U Trai Jisu, katkum na ka Gospel u Mathaios ka lynnong kaba hynriew (6) dkhot 2 haduh 4 (ar haduh kaba saw).