Khliehriat: Ka Seng Southern Border Youth Welfare Association (SBYWA), Elaka Rymbai & Elaka Lakadong, East Jaintia Hills District, ha ka jingialam u Samla Namphrangmi L Talang, General Secretary ka seng ryngkat ki dkhot jong ka ki la iai bteng ban leh ki kam isnei da kaba kner ia ka kti ban ai jingiarap da ki mar bam kum u khaw, Dai bad ka um phniang bam sa ha ki lai tylli ki shnong kynthup Lakadong Umlatdoh,Ladlakadong bad kumjuh ha shnong Umlyngsha mynta ka sngi 05tarik une bnai Jymmang 2020.
Kane ka jingiarap marbam ka Association ka dei kum shibynta ban iarap ïaki para briew ha kum kane ka por ba ki longing ba duk ki shem jingeh ban leit bylla namar ka jingdon ka pakhang shnong na ka bynta ban iakhun pyrshah iaka khlam COVID-19 ha baroh kawei Ri.
Ki marbam kiba la ai ka Association ki kynthup ia u Khaw, u Dai bad ka ump phniang bam sha ki 36 tylli ki longing baduk jong kitei ki Lai shnong.
Ha kane ka sngi la ioh ruh ia ki jingkren ai khublei bad pdiang na ki Waheh Shnong jong kitei ki Lai tylli ki Shnong kiba pynpaw ia ka jingkmen halor ka jingnoh iarap ka Seng sha ki longing ba duk ha ka shnong jong ki ha kum kane ka por kaba ki shitom.
U Samla Namphrangmi L Talang, Genl Secretary ka Seng u la ong “Ngi ai khublei ia ki nongialam shnong kiba la jied ia ki longing ba duk na ka bynta ban ioh ia kine ki lad jingiarap jong ka seng watla ki long ki barit ruh hynrei ngi la kyntu ia phi ban pdiang da ka mynsien jong ka jingsngewkmen namar ngi kum ka Association ngi iarap ia phi katkum ka jingkot bor jong ngi”
Une u samla u la ong ruh ngin iai bteng ban iarap shuh shuh na ka por sha ka por ia kito ki longing ba duk katkum jingkot bor jong ngi ha kano kano ka por bad kumjuh sha kiwei de ki shnong kiba dang hap hapoh ka jingtreikam jong ngi.
Phi don ban ong eiei?