Noh ar tylli ki trok sha riat ha Sunapur, sahkut ki nongniah ha jrong dieng

Khliehriat: Hynnin ka janmeit sngi saitjain, ar tylli ki trok kiba dang thmu ban leit buh mar sha Assam ki la iaid lait ia u surok bad hap shapoh synrang kaba jylliew kumba 200 phut eiei kaba don hajan ka Mandir ha Sunapur, East Jaintia HIlls.

Mar synjia kane ka jingjia, ki riew paidbah bad ki pulit na Umkiang ki la pyrshang ban wad ia ki nongniah hynrei kim shym la lap satia ia ki hynnin hynrei hadien pat ka khubor na ki pulit ka la iathuh ba baroh kiba don ha kitei ki ar tylli ki trok ki la lait im wat lada ka trok ka la hap shapoh riat kaba jylliew, hynrei la iathuh namar ba ki la sahkut noh ha ki dieng ha jrong suin ki la ioh ban lait im na katei ka jingjia.