Nongstoiñ: Ka kynhun ialehkai jong ka Umiam United kala lah ban pynliem noh ia ka kynhun ialehkai jong ka MLP da 1 kol la 0 ha ka jingiakhun ia ka 1st leg jong ka semi phainal jong ka lympung 2nd Invitation Knock out Football Tournamement bala pyniaid da ka New Nongstoiñ Sport Social Cultural Club (NNSSCC).
Wat la ka Umiam kala ioh ban khur ia ka jingjop hynrei kam shym pat la ioh satia ban rung sha ka phainal namar kan hap ban iakhun biang sa shisien ia ka MLP ha ka 2nd leg bad na katei ka 2nd leg ka kynhun kaba ioh ban tam kol kan ioh rung sha ka phainal.
Haba phai sha katei ka jingiakhun ia ka semi final hapdeng ka MLP pyrshah ia ka Umiam United kala long shisha ka jingialehkai kaba itynnad bha namar ba baroh ar tylli ki kynhun ki long kiba ia khlain bad ia biang bor bha bad tad haduh ban da kut noh ka jingiakhun jong ka kylla sstep baroh ar kynhun kim shym patla ioh ban ia pynkhih jar.
Haba wan phai biang sa sha ka kylla miet ka jingiakhun kala nang kham itynnad shuh shuh namar ba ki rangialehkai na baroh ar tylli ki kynhun kila iakhun doh iap bha ban pynioh lam khmat iala ka kynhun bad na ka liang jong ka Umiam United ha ka minit kaba 76 kala ioh ia ka kabu ksiar ban thep kol hadien ba kala ioh ia ka penalty bad khlem da pynsepei u Parwaj Bhujia u la shut ia ka bol bad kala rung beit jlang shapoh ka kol.
Ka MLP hadien ba kala shah thep shi kol kala iakhun tyngeh ban ioh pynphai noh bad kala ioh ruh ia ki ki katto katne tylli ki kabu hynrei kitei kila sepei lut namar ka jingtriem jong u Erick Nongkhlaw u ba dei u rangapkol ka Umiam u la lah ban iada ia ki bol ban rung shapoh ka kol bad tad haduh ban da kut noh syndon ka jingialehkai ka MLP kam shymla lah satia ban pynphai.
Katei ka shi kol jong ka Umiam kala nang pynjan ruh ia ka kynhun sha ka final jong katei ka lympung hynrei ka dang hap ban iakhun tyngeh biang sa ha ka second leg jong ka semi final bad lyngba ka second leg yn khein ruh da ka aggregate bad ka kynhun kaba ioh tam ka kol kan leit sha ka final.
Ha katei ka sngi ia ka nam man of the match la ioh ban khur da u Erick Nongkhlaw jong ka Umiam United u bala lah ban iada ia shibun tylli ki bol.
Phi don ban ong eiei?