Nongstoiñ: Ka kynhun ialehkai jong ka MLP FT kala ioh ban khur ia ka jingjop ha ka lympung kynjatbol kaba la tip kum ka 2nd Invitation Knock out Football Tournament bala pyniaid da ka New Nongstoiñ Sport Social & Cultural Club (NNSSCC).
U-Chesterfield-Nongdhar-jong-ka-MLP-u-bala-ioh-ban-khur-ia-ka-khusnam-Man-of-the-Match.
Ka jinglah jong ka MLP ban khur ia katei ka jingjop kadei hadien ba kala lah ban pynliem noh ia ka kynhun ialehkai jong ka Nongdaju SC da 5 kol la 3 kol ha ka jingiakhun pyrshah kaba la long hynnin ka sngi ha ka madan ialehkai jong ka New Nongstoiñ.
Haba phai sha katei ka jingiakhun kaba la long ha pdeng kitei ki ar tylli ki kynhun kala long shisha ka jingialehkai kaba itynnad bha namar ka jingialah ban ia lam mar kylliang ia ka bol bad ruh ka jingialah ban ia pynphai kawei hadien kawei.
Ha ka jingiakhun jong ka kylla step na ka liang jong ka MLP FT kala ioh ban lam khmat da 2 tylli ki kol ha kaba ia ka kol kaba nyngkong la ioh ban thep da u Niwan O Gatphoh ha ka minit kaba 12 bad kumjuh ha ka minit kaba 17 la ioh ban thep biang sa da u Chesterfield Nongdhar bad khlem da rit mynsiem na ka liang jong ka Nongdaju ruh kala ialeh tyngeh ban ioh pynphai pat ia kitei ki kol ha kaba kala ioh ruh ia ka kabu bad khlem da pynsep ei u Bansynshar Iawphniaw u la ioh ban pynphai ia ka shi ki kol ha katei hi ka minit kaba 17.
Shuh shuh tang hadien ka jingshah thep shi kol ka MLP kala lah ban pynphai biang sa ia ka kol kaba lai ha ka minit kaba 18 ia kaba la ioh ban thep biang da u Chesterfield Nongdhar bad ka jingiakhun kala nanag kham itynnad shuh shuh namar ka jinglah jong kitei ki ar kynhun ban ia thep kol kawei hadien kawei bad da ka jingiakhun tyngeh ka Nongdaju kala ioh biang ban thep sa ia ka kol kaba ar ha ka minit kaba 21 lyngba u juh u rang ialehkai u Bansynshar Iawphniaw bad ha shwa ba ka jingiakhun jong katei ka kylla kan kut noh ka MLP kala ioh ban khyrwait sa ia ka kol kaba saw ia kaba la ioh ban thep da u Teiborlang Siangshai ha ka minit kaba 39.
Hadien bala kut noh ka jingialehkai jong katei ka kylla step na ka liang jong ka MLP kala ioh ban thep haduh 4 tylli ki kol katba ka Nongdaju kala ioh ban pynphai 2 kol bad haba wan phai biang sha ka jingiakhun jong ka kylla miet ka MLP kala ioh ban thep biang sa ia ka kol kaba san ia kaba la ioh ban thep da u Chesterfield Nongdhar ha ka minit kaba 65 bad na ka liang jong ka Nongdaju ruh kala ioh biang ban pynphai sa ia ka kol kaba lai ia kaba la ioh ban thep da u Johnpaul Kharmaw ha ka minit kaba 64.
Na ka liang jong ka Nongdaju kala iakhun tyngeh ban dang ioh pynphai biang sa ia kitei ki ar tylli ki kol bala tam da ka MLP hynrei kam shymla ioh lad shuh bad tad haduh ban da kut noh ka jingialehkai ka Nongdaju kala hap ban mad noh ia ka nam rem da 5 kol la 3 kol bad hatei ka sngi ia ka nam Man of the Match la ioh ban khur da u Chesterfield Nongdhar jong ka MLP u bala ioh ban khyrwit hat trick ha katei ka sngi.
Na ka liang jong ka NNSSCC kala pyntip ba ka jingialehkai ka ban bud kan long biang sa ha ka 6 tarik mynta u bnai ka ban dei ka sngi Iew heh Nongstoiñ ha kaba ki ar tylli ki kynhun ki ban iakhun ha katei ka sngi kin long hapdeng ka Smit SC pyrshah ia ka Seinduli SC.